काठमाडौँ । नेकपा (मसाल) ले संस्कृतिविद् सत्यमोहन जोशीप्रति श्रद्धाञ्जली अर्पण गरेको छ ।
महामन्त्री मोहनविक्रम सिंहको हस्ताक्षरमा २०७९ असोज ३० गते शोकवक्तव्य जारी गर्दै मसालले श्रद्धाञ्जली अर्पण गरेको हो ।
शोकवक्तव्यमा जोशीलाई नेपाली साहित्य, संस्कृति र सभ्यतासम्बन्धी खोज–अनुसन्धानमा योगदान पुर्याएको उच्च सम्मानयोग्य व्यक्तित्व बताइएको छ ।
यस्तो छ, वक्तव्यको पूर्ण पाठ:
“संस्कृतिविद् सत्यमोहन जोशीको मृत्युप्रति हामीले गहिरो दुःख व्यक्त गर्दै सन्तप्त परिवारजनप्रति हार्दिक समवेदना प्रकट गर्दछौँ ।
नेपालको साहित्य, संस्कृति र सभ्यतासम्बन्धी खोज तथा अनुसन्धानमा उहाँको महत्त्वपूर्ण योगदान रहेको छ । नेपाली सभ्यताको मौलिक दर्शन निर्माणमा समेत उहाँले महत्त्वपूर्ण योगदान दिनुभएको थियो । उहाँले आफ्नो जीवनभरि नै देशको सामाजिक जीवनको गम्भीर अध्ययन गर्नुभएको थियो र उहाँले निर्माण गरेको उक्त दर्शनले देशलाई महत्त्वपूर्ण ढङ्गले मार्गनिर्देशनसमेत गर्ने गरेको छ । उहाँको मृत्युबाट देशले उच्च सांस्कृतिक अध्येता गुमाएको छ । उहाँको मृत्युले देशलाई गम्भीर क्षति भएको छ ।
अन्तमा, हामीले उहाँप्रति उच्च सम्मानका साथ हार्दिक श्रद्धाञ्जली अर्पण गर्दछौँ ।”
