काठमाडौं । पाँचदलीय गठबन्धन दलले सातवटै प्रदेशमा चुनावी भेला गर्ने भएका छन् । बिहीबार बसेको बैठकले सातै प्रदेशमा संयुक्त चुनावी भेला आयोजना गर्ने निर्णय गरेको हो ।
घोषित कार्यक्रम अनुसार कार्तिक ४ गते गण्डकी प्रदेशको पोखरामा, ४ गते नै लुम्बिनी प्रदेशको बुटवल, ५ गते विराटनगरमा र जनकपुर, कार्तिक ६ गते धनगढी र सुर्खेत र ७ गते काठमाडौंमा भेलाको आयोजना गरिएको छ ।
पोखराको कार्यक्रमको व्यवस्थापन नेकपा (एकीकृत समाजवादी) ले गर्नेछ भने बुटवल, विराटनगर, सुर्खेत र जनकपुरको कार्यक्रमको व्यवस्थापन नेपाली कांग्रेसले गर्नेछ।
यस्तै, धनगढी र काठमाडौंमा हुने भेलाको व्यवस्थापन माओवादी केन्द्रले गर्ने छ।
यसैगरी, पाँचदलीय गठबन्धनले संयुक्त अपील प्रकाशन गर्ने भएका छन् । बैठकले अपीलको ड्राफ्ट तयार गर्न चार दलबाट एक एक जना सदस्य रहेको कमिटी गठन गरेको छ ।
समितिमा राष्ट्रिय जनमोर्चाका सचिव हिमलाल पुरी, नेपाली कांग्रेसका नेता प्रकाशशरण महत, माओवादी केन्द्रका हितमान शाक्य र नेकपा (एकीकृत समाजवादी) का प्रमेश हमाल सदस्य हुनुहुन्छ ।
यस्तै, नेपाली कांग्रेसका वरिष्ठ नेता रामचन्द्र पौडेलको नेतृत्वमा रहेको गठबन्धन संयन्त्रलाई निर्वाचन परिचालन समन्वयको जिम्मा दिइएको छ । बैठकले प्रदेश र जिल्लास्तरमा गठबन्धन दलका प्रमुखहरु रहेको प्रदेश निर्वाचन समन्वय समिति गठन गर्ने निर्णयसमेत गरेको छ ।
जिल्ला संयन्त्रले आवश्यकता अनुसार निर्वाचन क्षेत्र तथा स्थानीय तहमा पनि निर्वाचन परिचालन समन्वय समिति निर्माण गर्ने सक्नेछ ।
गठबन्धनको नारा ‘संविधानको रक्षा, स्थिरता र समृद्धिका लागि गठबन्धन’ कायम गरिएको छ ।
