काठमाडौँ । आफूसम्बद्ध पार्टीबाट उम्मेदवारी दिने ठेगान नभएपछि केही चर्चित नेताहरूले स्वतन्त्र उम्मेदवारी दिएका छन । यसरी स्वतन्त्र उम्मेदवारी दिनेहरूमा नेकपा (एमाले) का पूर्व उपमहासचिव घनश्याम भुसालसहित छन् ।
एमालेले भुसाललाई उम्मेदवार नबनाउने भएपछि असोज २२ गते पार्टी छाडेको घोषणा गर्नुभएको थियो । यता, एमालेकै निवर्तमान सांसद रामवीर मानन्धरले काठमाडौँ क्षेत्र नं. ७ बाट स्वतन्त्र उम्मेदवारी दर्ता गराउनुभएको छ । पार्टीले उम्मेदवार नबनाएपछि मानन्धरले स्वतन्त्र उम्मेदवारी दिनुभएको हो । त्यसैगरी, एमालेका नेता प्रभु साहले रौतहट क्षेत्र नं. ३ बाट स्वतन्त्र उम्मेदवारी दिनुभएको छ ।
नेपाली काङ्ग्रेसका नेता दिनेश कोइरालाले पार्टीले उम्मेदवार नबनाएपछि चितवन क्षेत्र नं. ३ बाट स्वतन्त्र उम्मेदवारी दर्ता गराउनुभएको छ । नेता गोविन्दराज जोशीले तनहुँ क्षेत्र नं. १ बाट स्वतन्त्र उम्मेदवारी दर्ता गराउनुभएको छ । नेपाली काङ्ग्रेसबाट कारबाहीमा पर्नुभएका जोशी स्वतन्त्र उम्मेदवार बन्नुभएको हो । काङ्ग्रेसका नेता अमरेशकुमार सिंहले उम्मेदवार नबन्ने भएपछि स्वतन्त्र उम्मेदवारी दिनुभएको छ ।
निर्वाचनमा पार्टीले उम्मेदवार नबनाएपछि कतिपय नेताहरूले पार्टी परित्याग पनि गरेका छन् ।
काठमाडौँमा क्षेत्र नं ३ मा काङ्ग्रेसका पूर्व नगर सभापति श्रीकृष्ण ज्योतिले स्वतन्त्र उम्मेदवारी दिनुभएको छ । काङ्ग्रेसका कामपा–६ का पूर्व वडाध्यक्ष दीपेन्द्र लामाले प्रदेश (क) का लागि स्वतन्त्र उम्मेदवारी दिनुभएको छ । प्रदेश (ख) मा महिला सङ्घ काठमाडौँका अध्यक्ष विष्णुदेवी पुडासैनीले स्वतन्त्र उम्मेदवारी दिनुभएको छ ।
लेखक युग पाठकले झापा क्षेत्र नं. ५ बाट स्वतन्त्र उम्मेदवारी दिनुभएको छ । यो क्षेत्रमा नेकपा (एमाले) का अध्यक्ष केपी शर्मा ओलीले उम्मेदवारी दर्ता गराउनुभएको छ । त्यस्तै, प्रधानमन्त्री शेरबहादुर देउवाले उम्मेदवारी दर्ता गराउनुभएको डडेलधुरामा सागर ढकालले स्वतन्त्र उम्मेदवारी दिनुभएको छ ।
