दाङ । गत मङ्गलबारदेखि परेको अविरल वर्षाका कारण दाङमा तीन हजार बढी घर डुबानमा परेका छन् । यस क्रममा लमही नगरपालिका, गढवा गाउँपालिका र राप्ती गाउँपालिकामा डुबानका साथै धेरै क्षति भएको हो ।
वर्षाका कारण तीन हजार पाँच सय घर डुबानमा परेको जिल्ला प्रहरी कार्यालयका प्रहरी प्रवक्ता राजनकुमार गौतमले जानकारी दिनुभयो ।
राप्ती नदी, बबई नदी र अन्य खहरे खोलामा आएको बाढी बस्तीमा पस्दा तीन हजार पाँच सय ३५ घर डुबानमा परेका छन् भने ५८ घर भत्किएको जिल्ला आपत्कालीन सञ्चालन केन्द्रले जनाएको छ । घर डुबानमा परेपछि विस्थापित डुङ्गाको प्रयोग गरेर आफन्तको घरमा आश्रय लिएर बसेका छन् ।
सबैभन्दा बढी देउखुरी क्षेत्रमा क्षति भएको छ । लमही नगरपालिका, राजपुर गाउँपालिका, गढवा गाउँपालिका र राप्ती गाउँपालिका पूर्ण रूपमा प्रभावित बनेका छन् । त्यस्तै, घोराही उपमहानगरपालिका, तुलसीपुर उपमहानगरपालिका, दङ्गीशरण गाउँपालिका, बबई गाउँपालिका र शान्तिनगर गाउँपालिकाका अधिकांश वडा बाढीका कारण प्रभावित छन् ।
करिब एक सय जनालाई उद्धार गरेर सुरक्षित स्थानमा सारिएको छ । सशस्त्र प्रहरी, नेपाल प्रहरी, जनप्रतिनिधि र स्थानीय बासिन्दाको सक्रियतामा बाढीमा फसेकालाई उद्धार गरिएको छ । देउखुरी क्षेत्रमा बाढीले धान खेती नष्ट गरेको छ । पाकेर पाटेको धान र पाकेर काट्न ठिक्क पारेको धान डुबानमा परेको छ ।
लमही नगरपालिकामा एक हजार चार सय ६१ घर डुबानमा परेका छन् । ४३ पूर्ण रूपमा भत्किएका छन् । त्यस्तै, राजपुर गाउँपालिका दुई सय २१ घर डुबानमा परेका छन् । १५ घर पूर्ण रूपमा भत्किएका छन् ।
राप्ती गाउँपालिकामा ६ सय १० घर डुबानमा परेका छन् । ६५ घर पूर्ण रूपमा भत्किएका छन् ।
गढवा गाउँपालिकामा ६ सय ६० घर डुबानमा परेका छन् । ८० घर भत्किएका छन् ।
पूर्वपश्चिम राजमार्गमा झरेको पहिरो हटाउने प्रयास जारी छ । बिहानदेखि झरेको पहिरो हटाउन काम भइरहेको र कालाकाटेमा झरेको पहिरो हटाएर एकतर्फी सवारी साधन सञ्चालनमा ल्याइएको छ । घोराही–३ मसोटखोलामा पहिरो जाँदा लमही–घोराही सडक खण्ड अवरुद्ध छ । पहिरो हटाउने प्रयास भइरहेको छ ।
त्यस्तै, लमहीबाट घोराही लगिएको १३२ केभीको हाइटेन्सन लाइनको पोल ढलेको छ । ‘घोराही क्षेत्रमा बिजुली छैन । पहिरो पन्छाएर सडक खोल्ने काम भइरहेको छ’ प्रहरी नायब उपरीक्षक गौतमले भन्नुभयो । (रासस)
