धनवीर पुनमगर ##

वाह रे वाह अक्षता
तिमी कतिसाह्रो विचित्र
निधारमा टासिने पनि तिमी
मुखमा सिताको रूपमा तिमी
देउताको अक्षताको रूपमा
खोलाको बगरमा पिण्डको रूपमा
मर्दा पनि तिमी, पर्दा पनि तिमी
वाह रे वाह अक्षता ।

दहीसँग मुछेर खाए नुवागी,
निधारमा टाँसे टीका
चुटाई खाँदा खाँदा चिउरा बन्ने पनि तिमी
कराहीमा सेलको रूपमा घुम्ने तिमी
दुधसँगै मिष्ठान्नको रूपमा पाके खिर,
दुधसँग छुट्टाछुट्टै पाके दुध र भात
दालसँगै पाके खिचडी तिमी,
दालसँग छुट्टछुट्टै पाके दाल भात
मासुसँगै पाके बिरयानी तिमी,
मासुसँग छुट्टाछुट्टै पाके मासु भात
कराहीमा फ्राइड राइस
आजकल त पुलाउ, स्टिम नानाथरि
कनिका पनि तिमी, कनिकाबाट सोमरस
धनीका लागि नानाथरिका परिकार
गरिबका लागि माड बन्ने तिमी
मर्दाको मलामी, जिउँदाको जन्त
िसर्वाेपयोगी क्षमता भएको तिमी ।

कैयौँ तिम्रो अभावमा मरेका छन्,
कैयौंले सद्भाव भन्दै निधार भरेका छन्
वाह रे वाह अक्षता ।

कसैले लुकेर निधारमा टाँसेका छन्
कसैलाई निचा देखाउनलाई
कसैले गर्वका साथ निधारमा टँसाएका छन्
कसैलाई उँचा देखाउनलाई ।
तिमी निधारमा टाँसिनु र नटाँसिनुलाई
नानाथरिका टिप्पणी
तिमी पनि जातिविशेष उपयोग पो ?
अचम्म छ
तिमीलाई सेतो बनाई लगाउँदा एउटा,
रातो बनाई लगाउँदा अर्को ?
अचम्म छ
तिम्रो उपयोगितामा पनि राजनीति ?

बडादसैँ त धपायौँ विभिन्न परिकार बनेर,
कसैलाई निचा, कसैलाई उचा देखाएर ।
बडादशसैँमा निधारमा सिङ्गै टाँसिएका थियौ
अब तिहारमा धुलो पिठो भएर निधार भरिने छौ
त्यति मात्रै कहाँ हो र ?
रेखी र नौधारा पनि बन्ने छौ
फेरि तिमीलाई लिएर राजनीति हुने छ
आदर्शवादी र प्रगतिशील छुट्याइने छ,
बुर्जुवा र संस्कारवादी भनिने छ
वाह रे वाह अक्षता ।

कसैले संस्कारको रूपमा टाँसेका छन्
कसैले मायाँ, सद्भावको रूपमा
त कसैले आदर र सम्मानको रूपमा
कसैले खुसियालीको रूपमा
कसैले पुण्य कमाउन टाँस्ने
कसैले आशिर्वाद पाउन टाँसेका छन्
आखिर तिमी टाँसिनु र नटासिनुले
क्रान्ति नहुने र हुने भन्ने होला र ?

न तिमीलाई टँसाउँदैमा पाएको आशिर्वादले
सुखी भइन्छ
न स्वर्गको पुण्य र नर्कको श्राप पाइन्छ ।
न तिमीलाई निधारमा टाँस्दैमा क्रान्तिको
बाधक भइन्छ
निधारमा त के ?
पुरै शरीरभरि टाँसे पनि क्रान्ति रोकिँदैन,
अक्षतारूपी क्षेप्यास्त्रले क्रान्ति रोक्न सक्दैन,
किनकि नभएकाको विद्रोहको हुँकार हो क्रान्ति
क्रान्ति कतै रोकिने आँधी होइन
क्रान्ति त निरन्तर चल्ने वेग हो,
रोक्नै नसकिने एउटा वेग हो ।

२०७९ असोज २० गते, नयाँदिल्ली