बागलुङ बजार । बागलुङ नगरपालिका वडा नंं. ११ को तल्लो रामतोलामा एक महिनाअघि देखि खसिरहेको पहिरोका कारण यहाँका दर्जनौँ घरपरिवार बडादसैँको टीकासमेत नथापी भागाभागमा छन् ।

भदौको १९ गतेदेखि जमिन चिरा परेको र २१ गते अविरल वर्षात्पछि जमिन बग्न थालेको थियोे । निरन्तर बगिरहेको जमिनमा बडादसैँका बेला भइरहेको भारी वर्षाले झन् असर गरेको छ । जमिन बग्दा सडक, ठुला पिपलका रुखसमेत बगेका छन् ।

पहिरो खस्न थालेपछि स्थानीय किसानले लगाएका सुन्तलाको बगान, कुखुरापालन फार्मलगायत गोठ पुरिएका छन् । कतिपय घर चिरा परेका छन् भने केही किसानका घर र गोठ भत्केका छन् ।

‘पहिला एउटा पाटोमा मात्रै ठुलो पहिरो थियो, अहिले अर्को पाटो पनि बग्यो’ वडाध्यक्ष ज्ञानेन्द्र गौतमले भन्नुभयो– ‘सुरक्षित छन् भनेका घर र यहाँ रहेका पशुपन्छीको फार्मसमेत पुरिने अवस्थामा पुगे ।’

अविरल वर्षा र पहिरोसँगै खसेको भेल गाउँ पसेको छ । ‘आफ्नो घर छ तर पहिरोले राज गरेको छ, अर्कैको घरमा बडादसैँ मनाउनुपर्यो ।

बासबिनाको बडादसैँ खल्लो भयो’ स्थानीय कुलराज शर्माले भन्नुभयो– ‘छिमेकीका घर पनि चिरा परेका छन्, जुनसुकै बेला खस्छन् । हाम्रो बडादसैँ भागाभागमै बित्यो ।’ यो बस्तीका खानेपानीको ट्याङ्कीसमेत बगेपछि स्थानीयवासी चिन्तामा छन् ।

उक्त पहिराले उहाँसहित दर्जन बढी घरपरिवार विस्थापित भइसकेका छन् । केही घरपरिवार सुरक्षित ठाउँको खोजीमा रहेको अर्का स्थानीयवासी विष्णु पौडेलले जानकारी दिनुभयो ।

जमिन चिरा परेको स्थान हेर्दा थप सयौँ रोपनी जमिन, घर तथा सडक बग्ने अवस्थामा रहेको देखिएको उहाँले बताउनुभयो । पहिरोले यहाँको तमाखुवारी भन्ने अर्को बस्तीमा पनि जोखिम बढेको छ ।

‘यो सङ्केत हेर्दा यहाँको बस्ती नै जोखिममा भयो, पहिलाभन्दा अब धेरै घर विस्थापित हुने भए’ पौडेलले भन्नुभयो– ‘अर्बौं खर्चेर पनि रोकथाम हुने अवस्था छैन ।’

बगेको पहिरोले जैमिनी नगरपालिका वडा नं. १ को ओडार भन्ने स्थानमा पनि दर्जन घर विस्थापित भएका छन् । उनीहरूले पनि यो वर्षको बडादसैँ आफ्नो घर छोडेर अर्कैको घरमा मनाए । रामतोलादेखि तल्लो खण्ड जैमिनी नगरपालिका–१ मा पर्छ ।