स्याङजा बजार । स्याङ्जामा यसअघिका निर्वाचनमा मतदान हुँदै आएका दुई मतदानस्थल सारिएको र दुई नयाँ केन्द्र थपिएको छ ।
जिल्लामा कुल एक सय ९९ मतदान स्थलमध्ये वालिङ नगरपालिका र बिरुवा गाउँपालिकाका एक/एक मतदान स्थललाई स्थानान्तरण गरिएको हो ।
प्रमुख जिल्ला अधिकारी राजुप्रसाद पौडेलसहित जिल्लामा क्रियाशील राजनीतिक दलहरूको संयुक्त बैठकले दुई मतदान स्थल स्थानान्तरण गर्ने र दुई केन्द्र थप गर्ने सहमति भएको स्याङजा जिल्ला निर्वाचन कार्यालयका सूचना अधिकारी रामचन्द्र गौतमले जानकारी दिनुभयो ।
वालिङ नगरपालिका–८ को बोगटीडाँडामा रहेको मतदान स्थललाई वालिङ–८ कै शिवशक्ति सामुदायिक भवन भीमटारी बगैँचामा सारिएको छ। । बिरुवा–१ को जनजागृति आधारभूत विद्यालयमा रहेको मतदान स्थललाई बिरुवा–१ कै नवज्योति माध्यमिक विद्यालयमा सारिएको उहाँले जानकारी दिनुभयो ।
भौगोलिक कठिनाइका कारण अपायक, साँघुरो, पुराना भवनलगायत कारणले राजनीतिक दलहरूको सहमति र नयाँ थपिएका मतदान स्थल अवलोकन गर्दा उपयुक्त भएपछि मतदानस्थल सारिएको हो ।
‘यसअघिका निर्वाचनमा एक सय ९९ मतदान स्थलमा तीन सय १८ ओटा मतदान केन्द्रमा मतदान हुन्थ्यो’ सूचना अधिकारी गौतमले भन्नुभयो– ‘अहिले दुईओटा नयाँ निर्वाचन केन्द्र थप गरी तीन सय २० ओटा पुर्याइएको छ ।’
एउटा निर्वाचन केन्द्रमा अधिकतम एक हजार ५० जना पुगेपछि दोस्रो निर्वाचन केन्द्र रहने प्रावधानानुसार मतदाताको सङ्ख्या थपिएसँगै केन्द्र पनि थप गरिएको उहाँले जानकारी दिनुभयो । दुईओटा नयाँ मतदान केन्द्र वालिङ–४ को जेठीकन्या आधारभूत विद्यालय र ८ को केदारनाथ मन्दिरमा नयाँ मतदान केन्द्र थपिएको हो । जेठीकन्यामा एउटा थपिएसँगै दुईओटा मतदान केन्द्र भएको छ भने केदारनाथ मन्दिरमा एउटा थपिएसँगै तीनओटा मतदान केन्द्र पुगेको छ ।
आगामी मङ्सिर ४ गते हुन लागिरहेको प्रतिनिधि सभा तथा प्रदेशसभा निर्वाचनका लागि कुल मतदाता दुई लाख ४४ हजार ८९ छन् । तीमध्ये महिला एक लाख २४ हजार साट ७८, पुरुष एक लाख १९ हजार तीन सय १० र अन्य एक जना रहेका उक्त कार्यालयले जनाएको छ । (रासस)
