काठमाडौँ । बडादसैँको अवसरमा काठमाडौँ उपत्यका छाड्नेहरूको सङ्ख्या बढ्दै छ । सो कारणले सवारी साधनको चाप बढ्दा असोज १५ गते शनिबार बिहानको थानकोटसम्म जाम भएको थियो ।

काठमाडौँको कलङ्की होस् या गौशाला वा अन्य विभिन्न नाकामा त्यसैगरी सवारी साधनको चाप छ । यात्रुको भिड पनि उत्तिकै छ । प्रहरीलाई सवारी साधनको भिड मिलाउन हम्मे हम्मे परिरहेको छ । अन्य समयमा शनिबार प्राय: खाली हुने काठमाडौँका सडकमा भने सवारी साधनको बाक्लो उपस्थिति छ ।

पोकापुन्तुरा बोकेर मानिस उपत्यका छाड्न हतारिएका दृष्य विभिन्न क्षेत्रमा देख्न सकिन्छ । टिकट काटेकाहरू सवारी साधन कुरिरहेका देखिए भने टिकट नकाट्ने यात्रु सिट खाली रहेका सवारी साधनको प्रतिक्षा गरिरहेका भेटिए । सिट नपाएका ट्रक तथा अन्य सवारी साधनमा समेत गइरहेका थिए ।

काठमाडौँ उपत्यका ट्राफिक प्रहरी कार्यालयका अनुसार दसैँ सुरु भएपछि घटस्थापना (असोज १० गते सोमबार) देखि क्रमश: बाहिरिने यात्रुको चाप बढिरहेको छ । त्यस दिन ६० हजार यात्रुले उपत्यका छाडेका थिए । असाजे १३ गते बिहीबार ७१ हजार सात सय यात्रुले उपत्यका छाडेकोमा असोज १४ गते शुक्रबार उपत्यका छाड्नेको सङ््ख्या ८४ हजार रह्यो । शनिबार भने त्यसको तुलनामा दोब्बर (दुई लाख) बढीले उपत्यका छाड्ने अनुमान गरिएको कार्यालयका सहप्रवक्ता प्रहरी उपरीक्षक अवदेश विष्ट क्षेत्रीले जानकारी दिनुभयो ।

शनिबार साँझसम्म झन्डै पाँच लाख मानिसले उपत्यका छाडेने उहाँको अनुमान थियो । काठमाडौँ उपत्यका ट्राफिक प्रहरी कार्यालयका अनुसार प्रहरीको अभिलेखभन्दा बाहिर रिजर्व गरेर विभिन्न नाका हुँदै जाने र निजी सवारीमा जानेको सङ्ख्या यकिन नभएकाले उपत्यका छाड्ने सङ्ख्या त्यसको दोब्बर हुनसक्ने अनुमान छ ।

कुन दिन कति यात्रु भित्रिए, कति बाहिरिए ?
ट्राफिक प्रहरीका अनुसार असोज १० गते आठ हजार सात सय २९ ओटा सवारी साधानमा ४५ हजार आठ सय २३ यात्रु भित्रिएका थिए भने आठ हजार नौ सय चार सवारी साधनमा ६० हजार आठ सय ४१ यात्रु बाहिरिएका थिए ।

असोज ११ गते आठ हजार चार सय २७ सवारी साधानबाट ४५ हजार ३३ यात्रु भित्रिएकोमा नौ हजार एक सय ६१ सवारी साधनबाट ६२ हजार चार सय ३२ यात्रु बाहिरिएको अभिलेख छ ।

त्यस्तै, असोज १२ गते आठ हजार नौ सवारी साधनबाट ४५ हजार दुई सय ६० यात्रु भित्रिएकोमा १० हजार ८६ सवारी साधनबाट ७१ हजार ७६३ यात्रु बाहिरिएका थिए ।

असोज १३ गते आठ हजार २३ सवारी साधनमार्फत सोही हाराहारीमा यात्रु भित्रिएकोमा १० हजार दुई सय १९ सवारी साधनमार्फत ७४ हजार तीन सय ६२ यात्रु बाहिरिए ।

असोज १४ गते शुक्रबार भने सात हजार ४६० सवारीमार्फत ३७ हजार तीन सय ४० यात्रु भित्रिँदा १० हजार दुई सय ६७ सवारी साधनमार्फत ८४ हजार ८७ यात्रु बाहिरिएको तथ्याङ्क छ । (रासस)