काठमाडौं । नेकपा (मसाल) का महामन्त्री मोहनविक्रम सिंहलाई डेंगु संक्रमण भएको छ ।
पार्टी कामको शिलशिलामा रुपन्देहीमा रहनुभएका सिंहलाई ज्वरो आएपछि परीक्षण गर्दा डेंगु संक्रमण देखिएको हो ।
सिंहको स्वास्थ्य अवस्था सामान्य रहेको र ज्वरो घटेको सिंहसँगै रहनुभएका राष्ट्रिय जनमोर्चाका केन्द्रीय सदस्य वाशुदेव पोख्रेलले युगदर्शनलाई जानकारी दिनुभयो ।
उहाँलाई हिजो (मंगलबार) बुटवलस्थित लुम्बिनी प्रादेशिक अस्पतालमा भर्ना गरिएको थियो । सिंह आज भैरहवाबाट काठमाडौं आउँदै हुनुहुन्छ । उहाँलाई राजधानीको ह्याम्स अस्पतालमा थप उपचार गरिने छ ।
सिंह केही दिनअघि मूल प्रवाह अखिल भारत नेपाली एकता समाजको कार्यक्रममा सहभागी हुन लखनउ पुग्नुभएको थियो।
८७ वर्षीय सिंह राजनीतिक कामका शिलशिलामा विभिन्न जिल्ला र प्रवासमासमेत दौडाहा गरिरहनुभएको छ ।
गतवर्ष उहाँलाई कडा खालको कोरोना संक्रमण भएको थियो । तर, केही दिनको उपचारलगत्तै उहाँ फेरि पूर्ववत राजनीतिक काममा व्यस्त हुनुभएको थियो ।
