बागलुङ । गलकोट नगरपालिका–११ रिघामा राष्ट्रिय जनमोर्चाको प्रशिक्षण भेला सम्पन्न भएको छ ।
शुक्रबार राजमो वडा समितिको आयोजनामा वडा स्तरिय कार्यकर्ता प्रशिक्षण भेला सम्पन्न भएको हो ।
कार्यक्रममा राष्ट्रिय जनमोर्चाका राष्ट्रिय परिषद सदस्य तथा काठेखोला गाउँपालिकाका उपाध्यक्ष तिलक थापा र राजमो गण्डकी प्रदेश सचिव वेदिलाल सापकोटाले प्रशिक्षण दिनुभएको थियो ।
त्यसक्रममा उहाँहरुले देशको राजनीतिक आन्दोलनमा धेरै परिवर्तन आए पनि जनताको अवस्था परिवर्तन हुन नसकेको बतउनुभयो । उहाँहरुले राष्ट्रियता र जनजीविकाको अवस्था कमजोर बनिरहेको बेला राष्ट्रिय जनमोर्चाले सञ्चालन गरेको राष्ट्रियता र जनजीविकाको पक्षमा चलाएको आन्दोलनलाई सशक्त बनाउनुपर्नेमा जोड दिनुभएको थियो ।
राजमो वडाअध्यक्ष भक्तिराम पुनको अध्यक्षतामा भएको कार्यक्रमा स्वागत किसान विक र सञ्चालन सचिव दलबहादुर बुढाथोकीको गर्नुभएको थियो ।
हेमप्रसाद पुनको सम्झना
प्रशिक्षण कार्यक्रमसँगै पूर्वविद्यार्थी नेता तथा अखिल नेपाल युवक संघका पूर्वकेन्द्रीय अध्यक्ष हेमप्रसाद पुनको सम्झनामा स्मृति सभा पनि सम्पन्न गरिएको छ।
स्मृति सभालाई सम्बोधन गर्दै काठेखोला गाउँपालिकाका उपाध्यक्ष तिलक थापाले हेम प्रसाद पुन एक निडर जुझारु र संघर्षशील युवा नेता हुनुहुन्थ्यो भन्नुभयो । उहाँको संघर्षले नेपालको राजनैतिक तथा युवा आन्दोलनमा ठूलो क्षति पुगेको थापाले बताउनु भयो ।
नेता थापाले भन्नुभयो –‘उहाँले सम्पूर्ण विभेद तथा उत्पिडनका विरुद्ध गर्नुभएको संकल्प हामीले पूरा गर्नसक्ने मात्र उहाँप्रति सच्चा श्रद्धाञ्जली हुनेछ ।’
राजमो गण्डकी प्रदेश सचिव वेदिलाल सापकोटा, राजमो जिल्ला सदस्य पदम श्रेष्ठ, जिल्ला सदस्य खडक विक, हेमप्रसाद पुनको भाइ तथा सानो रिघा आधारभूत विद्यालयका प्रधानअध्यापक वीरेन्द्र पुनले पनि सम्बोधन गर्नुभएको थियो ।
