शिव पन्थी, प्यूठान ।
राष्ट्रिय जनमोर्चाबाट अलग भएको समूहले बनाएको कथित राजमो समन्वय समितिमा सामेल लीलबहादुर राउत पुनः मूल घरमै फर्कनु भएको छ ।
नेता राउतले मंगलबार एक वक्तव्य जारी गर्दै आफू पुनः राजमोमै फर्किएको बताउनुभएको छ । उहाँ लुम्बिनी प्रदेश समन्वयका सल्लाहकार तथा प्यूठान जिल्ला सदस्य रहनुभएको थियो ।
नेता राउतले राष्ट्रिय जनमोर्चा समन्वयको नामबाट भम्र छरेर इमान्दार कार्यकर्ताहरुलाई बाटो बिराउन मद्दत पुर्याएको बताउनु भयो । उहाँले समन्वयको गतिविधिबारे आफूले त्यहाँ भित्र गएर बुझेको भन्दै उनीहरुको क्रान्तिकारी हौवामा भ्रमित साथीहरुलाई आफ्नै घर राजमोमा फर्किन आह्वान गर्नुभयो ।
नेता राउतलाई राजमो लुम्बिनी प्रदेश सदस्य तथा प्यूठान जिल्ला उपाध्यक्ष ईमानसिंह खड़काले सदस्यताको प्रमाण पत्र दिएर पुनः राष्ट्रिय जनमोर्चामा स्वागत गर्नुभएको थियो ।
माण्डबी गाउँपालिका चकचकेममा आयोजित राष्ट्रिय जनमोर्चाको प्रशिक्षण भेलाका क्रममा राउत मूल घरमै फर्केको घोषणा गर्नुभएको हो ।
कार्यक्रममा राजमो लुम्बिनी प्रदेश सल्लाहकार वाशुदेव पोख्रेलले समसामयिक राजनीतिक विषयमा प्रशिक्षण दिनुभएको थियो ।
नेता पोख्रेलले गणतन्त्र, राष्ट्रियता र धर्मनिरपेक्षताको रक्षा तथा संघीयता, एमसीसी सम्झौता र राष्ट्रघाती नागरिकता विधेयक खारेजीका लागि निरन्तर संघर्ष जारी राख्नुपर्ने आवश्यकता रहेको बताउनु भयो ।
कार्यक्रममा राजमो जिल्ला उपाध्यक्ष ईमान सिंह खड़का, प्यूठान जिल्ला समन्वय समिति सदस्य, इन्द्र बहादुर खड़काले शुभकामना मन्तव्य दिनुभएको थियो ।
त्यस्तै, राजमो स्वर्गद्वारी नगर सदस्य शिव पन्थी, नरेन्द्र खड़का, शंकर आचार्यको पनि आतिथ्यता रहेको थियो ।
