काठमाडौँ । प्रगतिशील पत्रकार सङ्घ, नेपालको प्रथम राष्ट्रिय सम्मेलन आगामी फागुन महिनामा हुने भएको छ । २०७९ असोज १ र २ गते प्रशिक्षणसहित दाङको भालुबाङमा सम्पन्न केन्दीय समिति बैठकले सो निर्णय गरेको हो ।
केन्द्रीय संयोजक श्यामलाल पोखरेलको हस्ताक्षरमा असोज ४ गते जारी प्रेसविज्ञप्तिमा जनाइएअनुसार बैठकले मिडिया काउन्सिल विधेयक खारेजीको माग गरेको छ । त्यस्तै, केन्द्रीय सचिवालय गठन, सल्लाहकार नियुक्ति, त्रैमासिक कार्यक्रम, अक्षयकोष निर्माणलगायतका विषयबारे बैठकमा निर्णय गरिएको विज्ञप्तिमा उल्लेख छ ।
यस्तो छ, प्रेसविज्ञप्तिको पूर्ण पाठ :
“प्रगतिशील पत्रकार सङ्घ, नेपाल केन्द्रीय समितिको बैठक २०७९ असोज १ र २ गते दाङको भालुबाङमा भौतिक उपस्थिति र भर्चुअल दुवै माध्यमबाट सम्पन्न भएको छ । बैठकका निर्णयहरू सार्वजनिक गर्न यो प्रेसविज्ञप्ति जारी गरिएको छ ।
१. बैठकले राष्ट्रियसभाले पारित गरेर प्रतिनिधि सभामा पठाएको मिडिया काउन्सिल विधेयकको विरोध गर्ने गरेको छ । समाचार लेखेकै कारणमा अपराधीलाई झैँ लामो अवधिको सजाय प्रस्तावित गरिएको उक्त विधेयक गलत छ । त्यस्तै, विधेयकमा प्रेस स्वतन्त्रता विरुद्ध कैयौँ गम्भीर आपत्तिजनक विषयहरू समावेश गरिएका छन् । हाम्रो सङ्गठन उक्त विधेयक खारेजीको माग गर्दछ । त्यसका साथै यस विधेयकका विरोधमा आउने पत्रकार सङ्गठनसित हाम्रो सङ्गठनले सहकार्य गर्ने छ ।
२. प्रगतिशील पत्रकार सङ्घको प्रथम राष्ट्रिय सम्मेलन आगामी फागुन महिनामा गरिने छ । त्यसको मिति, स्थान र अन्य आवश्यक निर्णय गर्ने अधिकार सचिवालयलाई दिइएको छ ।
३. सङ्गठनको संशोधित विधान पारित गरिएको छ । त्यसका साथै घोषणापत्र लेखनका लागि श्यामलाल पोखरेल, प्रकाश थापामगर, सुमन अधिकारी, विद्यानाथ अधिकारी र नारायण गिरी समावेश रहनुभएको समिति गठन गरिएको छ ।
४. केन्द्रीय सचिवालय गठन गरिएको छ । त्यसमा श्यामलाल पोखरेल, प्रकाश थापामगर, विनोद पौडेल, विद्यानाथ अधिकारी, प्रज्ज्वल पहाडी, ताराप्रसाद शर्मा र महेश रिजाल रहनुभएको छ । एवम् प्रकारले सल्लाहकारमा बाँकेबाट जगदीश ढकाल र पर्शुराम लामिछाने तथा डोटीबाट डबल बोगटीलाई चयन गरिएको छ ।
५. केन्द्रीय समितिको तर्फबाट त्रैमासिक रूपमा भौतिक उपस्थिति वा भर्चुअल कार्यक्रम गर्ने ठेगान भएको छ । त्यसको व्यवस्थापनसित सम्बन्धित आवश्यक निर्णय सचिवालयले गर्ने छ ।
६. संस्था दर्ताबारे आवश्यक छलफल गर्नका लागि श्यामलाल पोखरेल, प्रकाश थापामगर, विनोद पौडेल, नारायण गिरी र गोपाल भट्टराईसहितको समिति निर्माण गरिएको छ ।
७. बैठकले पत्रकारिता पेसाको प्रोत्साहन र सम्मानस्वरूप पत्रकारलाई पुरस्कार दिन अक्षयकोष निर्माण गर्न पहल गर्ने गरेको छ ।
८. बैठकले सङ्गठनको आन्तरिक परिचालनसम्बन्धी अन्य कैयौँ निर्णयहरू पनि गरेको छ ।”
