बुर्तिवाङ । बागलुङको ढोरपाटन नगरपालिमा वडा नं १ मा राष्ट्रिय जनमोर्चाको प्रशिक्षण भेला सम्पन्न भएको छ ।
कार्यक्रममा राजमो केन्द्रीय सदस्य गौरीश्वर पाण्डेले समसामयिक राजनीतिक विषयमा प्रशिक्षण दिनुभएको थियो ।
त्यसक्रममा नेता पाण्डेले गणतन्त्र, राष्ट्रियता र धर्मनिरपेक्षताको रक्षा तथा संघीयता, एमसीसी सम्झौता र राष्ट्रघाती नागरिकता विधेयक खारेजीका लागि निरन्तर संघर्ष जारी राख्नुपर्ने आवश्यकता औँल्याउनुभयो ।
‘केपी ओलीले २÷२ पटक संसद विघटन गरी प्रतिगमनकारी भूमिका खेलेका कारणले प्रतिगमनविरुद्ध मुद्दा मिल्ने पार्टीसँग राष्ट्रिय जनमोर्चाले गठबन्धन गर्नुपरेको छ’ उहाँले भन्नुभयो, ‘गठबन्धनका दलहरुसँग कैयौं राजनीति मतभेद हुँदाहुँदै प्रतिगमनको विरुद्धमा गठबन्धन गर्नुपरेको हो ।’
कार्यक्रममा अखिल नेपाल बुद्धिजीवी संघका केन्द्रीय सदस्य धन बहादुर कुँवर, जातीय समता समाजका केन्द्रीय सदस्य नर बहादुर सुनारले पनि शुभकामना मन्तव्य राख्नु भएको थियो ।
यस्तै, रक्तिम सांस्कृतिक अभियानका कलाकारहरुले गीत प्रस्तुत गरेका थिए ।
कार्यक्रममा रक्तिम साँस्कृतिक अभियानका केन्द्रीय सचिव सहबिन अर्गेजा, अखिल नेपाल महिला संघ ढोरपाटन नगर अध्यक्ष धन कुमारी कुँवर, रक्तिम साँस्कृतिक अभियान ढोरपाटन नगर अध्यक्ष कामरेड झक प्रसाद श्रेष्ठ, राष्ट्रिय जनमोर्चा नगर सचिवालय सदस्य कामरेड कुल बहादुर छन्त्याल र अखिल नेपाल युवक संघ नगर सदस्य प्रेम केसीको पनि उपस्थिति थियो ।
राष्ट्रिय जनमोर्चा ढोरपाटन नगरका कार्यवाहक अध्यक्ष निमलाल पाण्डेको अध्यक्षता तथा अखिल नेपाल जनजाति सम्मेलनका नगर अध्यक्ष ओम प्रसाद बुढाको स्वागत मन्तव्यमा अघि बढेको कार्यक्रममा राजमो ढोरपाटन–१ का वडा सचिव वीर बहादुर गोतामेले सञ्चालन गर्नु भएको थियोे ।
