काठमाडौं । राष्ट्रिय जनमोर्चाले गठबन्धन दलबीच सिट बाँडफाँटमा अलमलिँदा चुनाव प्रचारमा बाधा पुगेको ठहर गरेको छ ।

पाँचदलीय गठबन्धनमा सामेल राष्ट्रिय जनमोर्चा सिट बाँडफाँट कार्यदलको बैठकमा नियमित सहभागी हुने गरेको छ । तर, गठबन्धनमा अहिलेसम्म औपचारिक निर्णय भने हुन सकेको छैन ।

पार्टीका तर्फबाट महासचिव मनोज भट्टले बिहीबार वक्तव्य प्रकाशित गरी पाँचदलका बीच सिटहरुबारे नै अन्योलको स्थिति हुँदा जनताका बिचमा जाने र चुनावको प्रचार प्रसार गर्ने काममा बाधा पुगिरहेको बताउनुभएको छ ।

यस्तै, राजमोले सप्रतिनिधि सभामा बागलुङ १ बाट अध्यक्ष चित्रबहादुर केसी र प्युठानबाट दुर्गा पौडेललाई उठाउने निर्णय गरेकोमा गठबन्धन दलहरुले त्यसलाई स्वीकार गरेको पनि स्पष्ट पारेको छ । तर, त्यसबारे औपचारिक निर्णय भने भइनसकेको महासचिव भट्टले बताउनुभएको छ ।

यस्तो छ वक्तव्य
‘आगामी मंसिर ४ गते सम्पन्न हुने आम चुनावले यो मात्र निर्णय गर्ने छैन कि त्यसपछि कुन पार्टीको सरकार बन्ने छ । त्यो चुनावले त्योभन्दा बढी र निर्णयात्मक रुपले यो कुराको फैसला गर्नेछ : देश प्रतिगमनको दिशामा जानेछ वा त्यसलाई रोक्न सकिने छ ? त्यो चुनाव पछि देश प्रतिगमनको बाटोमा नजाओस् भन्नका लागि चुनावमा प्रतिगामी शक्तिलाई निर्णयात्मक रुपले पराजित गर्नुपर्ने आवश्यकता छ । त्यो कार्य सफल पार्नका लागि पाँचदलीय चुनावी तालमेललाई सफलतापूर्वक सम्पन्न गर्नु अहिलेको देशको राष्ट्रिय आवश्यकता हो ।

अहिलेसम्म पाँचदलीय गठबन्धन वा चुनावी तालमेलका कारणले प्रतिगमन बारम्बार पराजित हुँदै आएको छ । हामीले कोशिस गर्नुपर्दछ आगामी चुनावमा पनि त्यही प्रकारको सफलता प्राप्त होस् । त्यो नै देश र जनताको व्यापक हितमा हुनेछ । यदि प्रतिगमन विजयी भएमा जनताका महान आन्दोलनहरुद्वारा प्राप्त उपलब्धीहरु, खास गरेर लोकतन्त्र, गणतन्त्र वा धर्मनिरपेक्षता समेत समाप्त हुने खतरा रहने छ । त्यसैले पाँचदलीय चुनावी तालमेललाई सफलतापूर्वक अगाडि बढाउनु अहिलेको राष्ट्रिय आवश्यकता भएको छ ।

यो कुराप्रति हाम्रो गम्भीर ध्यान आकर्षित भएको छ कि लामो समयदेखि आगामी चुनावसित सम्बन्धित सिटहरुको बाँडफाँटमाबारे बैठकहरु भइरहेका छन् र अहिलेसम्म कुनै ठोस निर्णय हुन सकेको छैन । अब चुनावका लागि दुईमहिना मात्र बाँकी रहेको छ । चुनावका सिटहरुबारे निर्णय नहुँदा त्यस सम्बन्धी प्रचार प्रसारको काममा बाधा पुगिरहेको छ । प्रतिगमनको पक्षमा भएका राजनीतिक शक्तिहरुले आफ्नो प्रचार प्रसारको काम अगाडि बढाइरहेका छन् । तर पाँच दलका बीच सिटहरुबारे नै अन्योलको स्थिति हुँदा जनताका बिचमा जाने र चुनावको प्रचार प्रसार गर्ने काममा बाधा पुगिरहेको छ ।

राष्ट्रिय जनमोर्चाले आगामी चुनाव बारे जुन दावी गरेको छ त्यो न्यायपूर्ण र तर्कसंगत छ । राष्ट्रिय सभाको चुनावमा हामीले जुन नीति अपनाएका थियौं, त्यसलाई आगामी चुनावका सन्दर्भमा पनि अपनाउनु पर्दछ भन्ने कुरामा हाम्रो जोड छ । पाँचदलका बिचमा यो समझदारी बन्दै आएको छ कि पाँचदल मध्ये पहिले जसले जुन सिटहरु जितेको छ, त्यहाँ त्यसलाई नै त्यो सिट दिने र एमालेले जितेका स्थानहरुमा आपसमा समझदारी गरेर सिटहरु बाडेर चुनाव लड्ने ।

त्यस अनुसार नै प्यूठानमा पहिले राजमोले जितेको हुनाले त्यहाँ हामीले दावी गरेका छौ भने बागलुङमा पहिले एमालेले जितेको क्षेत्र नं. १ मा हामीले दावी गरेका छौं । त्यसका लागि राजमोले बागलुङको क्षेत्र नं. १ मा हाम्रो पार्टीले राष्ट्रिय जनमोर्चाका अध्यक्ष का. चित्रबहादुर केसी तथा प्यूठानमा राजमोकी उपाध्यक्ष तथा प्रवक्ता का. दुर्गा पौडेललाई उम्मेदवार बनाउने निर्णय गरेको छ ।

पाँचदलका बिचको बैठकमा राजमोको उक्त दुवै दावीलाई सामान्यतः स्वीकार गरिएकोछ । तर प्यूठान र बागलुङका उक्त दुवै सिट राजमोलाई दिने बारे पाँच दलका बीच सामान्य प्रकारको समझदारी बनेको भएपनि त्यसबारे औपचारिक रुपमा अन्तिम निर्णय हुन र पाँचदलका तर्फबाट आधिकारिक रुपमा घोषणा हुन बाँकी भएको कुरा हामीले स्पष्ट गर्न चाहन्छौं । हामीले आशा गरेका छौं बागलुङ र प्यूठान बारे मात्र होइन देशका अन्य सबै सिटहरुबारे पनि छिटै आधिकारिक घोषणा हुनेछ भन्ने हामीले आशा गरेका छौं । त्यसका लागि पाँचदल मध्येका अन्य सबै पक्षहरुको गम्भीर ध्यान आकर्षित गर्न चाहन्छौं ।

पाँचदलका बिचमा संसदका सिटहरु बाहेक प्रदेशका सिटहरु बारे अहिलेसम्म छलफलले प्रवेश नै पाएको छैन । त्यसबारे पनि छिटै निर्णय हुनुपर्दछ भन्ने कुरामा हाम्रो जोड छ । त्यसबारे छलफल सुरुभएपछि हामीले प्रदेशका निर्वाचन क्षेत्रहरु बारे पनि आफ्नो दावी पेस गर्दै जानेछौं । त्यसबारे पनि न्यायपूर्ण तरिकाले निर्णय हुनेछ भन्ने हामीले आशा गरेका छौं ।

अन्तमा, संसदीय वा प्रदेशका निर्वाचन क्षेत्रहरुका उम्मेदवारहरु बारे पाँचदलका बिचमा सही र न्यायपूर्ण तरिकाले निर्णयहरु भएमा नै प्रतिगमनलाई निर्णयात्मक रुपले पराजित गर्नु सम्भव हुनेछ भन्ने हाम्रो विश्वास छ र त्यसका लागि हामीले सम्बन्धित सबै पक्षहरुको ध्यान आकर्षित गर्न चाहन्छौं ।’
मिति : २०७९–०५–३०
मनोज भट्ट, महासचिव