काठमाडौं । महाअभियोग सिफारिस समितिले बोलाएका छलफलमा चार पूर्वप्रधानन्यायाधीशहरु पनि नजाने भएका छन् । निलम्बित प्रधानन्यायाधीश चोलेन्द्रशम्सेर जबराले बयानको क्रममा नाम लिएका चार पूर्वप्रधानन्यायाधीश महाभियोग सिफारिस समितिमा नजाने नजाने निर्णय गरेका हुन् ।
पदीय मर्यादा र स्वतन्त्र न्यायपालिकाको अवधारणा अनुसार समितिको बैठकमा सहभागी नहुने पूर्वप्रधानन्यायाधीशहरुले निर्णय गरेको स्रोतले बतायो ।
समितिको बैठकले बिहीबार पूर्वप्रधानन्यायाधीश र न्यायाधीशहरुलाई सोधपुछका लागि बोलाएको थियो । समितिमा नजाने भनेर उनीहरुले खबर पठाइसकेका छन् ।
निलम्बित प्रधानन्यायाधीश जबराले महाभियोगमााथिको बयानका क्रममा चार पूर्वप्रधानन्यायाधीशहरुलाई अवकाशपछि समेत अदालतमा आफ्नो भाग खोजेको आरोप लगाएका थिए ।
मिनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीले प्रतिनिधिसभा विघटनदेखि जबराविरुद्ध सर्वोच्च अदालतमा आन्दोलन हुँदा विज्ञप्ति निकालेर आफ्ना धारणा राखेका थिए । त्यसमाथि आक्रोश पोख्दै निलम्बित प्रधानन्यायाधीश जबराले उनीहरुमाथि भाग खोजेको आरोप लगाएका थिए ।
हिजो नै सर्वोच्च अदालतका न्यायाधीशहरुले पनि पूर्ण बैठकमार्फत समितिमा जान नसक्ने निर्णय गरेका थिए । समितिले पत्र पठाउँदै ६ जना न्यायाधीशलाईं बोलाएपछि सर्वोच्च अदालतको फुलकोर्टबाटै उक्त छलफलमा सहभागी हुन नमिल्ने निर्णय गरेका थिए।
चोलेन्द्रले बयानका क्रममा लान्छना लगाएका वकिलहरुलाई समितिले दिउँसो ३ बजे बोलाएको छ।
