काठमाडौं । चिनियाँ जनकंग्रेस अध्यक्ष ली चान्सु चारदिने नेपाल भ्रमण सम्पन्न गरी फर्केका छन् । बिहीबार त्रिभुवन अन्तर्राष्ट्रिय विमानस्थलमा सभामुख अग्नि सापकोटा, संघीय संसद र परराष्ट्र मन्त्रालयका अधिकारीले ली नेतृत्वको चिनियाँ टोलीलाई बिदाइ गरे ।
ली नेतृत्वको चिनियाँ भ्रमण टोली विशेष विमानबाट बेइजिङ हुँदै दक्षिण कोरिया प्रस्थान गर्नेछ ।
अध्यक्ष ली काठमाडौं आएलगत्तै उच्चस्तरीय राजनीतिक भेटवार्तामा सक्रिय भएका थिए । नेपालमा रहँदा उनले राष्ट्रपति विद्यादेवी भण्डारी, सभामुख सापकोटा, प्रधानमन्त्री शेरबहादुर देउवा र पूर्वप्रधानमन्त्रीद्वय केपी शर्मा ओली र पुष्पकमल दाहाल प्रचण्डसँग छुट्टाछुट्टै भेटवार्ता गरेका थिए ।
यस्तै, उनले बुधबार भक्तपुर भ्रमण गरेका थिए ।
उत्तरी नाका खुले
ली को नेपाल भ्रमणसँगै चिनियाँ नाका पनि सुचारु भएका छन् । करिब एक महिनापछि रसुवागढी र तातोपानी नाका खुलेका हुन् ।
तिब्बतमा कोभिड बढेको भन्दै चीनले एकतर्फी रुपमा नाका बन्द गरेको थियो । नेपाली नेताहरुसँग ली ले उत्तरी नाका नियमित खुल्ने विश्वास दिलाएका थिए ।
नाका खुलेसँगै चीनबाट आयात भएर रोकिएका वस्तु भित्रन थालेका छन् ।
तातोपानी नाकाबाट भदौ २५ गते नै वस्तु आयात हुन थालेकोमा बिहीबारबाट रसुवा नाकाबाट समेत वस्तु आयात शुरु भएको छ।
दशैँका लागि आयात गरिएको सामान लामो समयसम्म नाकामा रोकिएपछि व्यवसायी चिन्तित बनेका थिए ।
