भरतपुर । पूर्वी चितवनको दाना उद्योगमा आगलागी भएको छ ।

गए राति राप्ती नगरपालिका–३ झुरझुरेस्थित मञ्जुश्री दाना उद्योगमा आगलागी भएको हो ।

कुखुराको दाना राखिएको गोदाममा विद्युत् सर्ट भएर आगलागी भएको जिल्ला प्रहरी कार्यालयले जानकारी दिएको छ ।

आगलागीबाट दाना बनाउने मेसिनमा क्षति पुगेको छ । तयारी दाना, उत्पादनका लागि राखिएको मकै, पिना र ढुटो जलेर नष्ट भएको उद्योगका सञ्चालक किरणभूषण ओलीले जानकारी दिनुभयो ।

आगलागीबाट करिब रु एक करोड ५० लाख बराबरको क्षति भएको उहाँले बताउनुभयो । विद्युत् सर्ट भएर राति करिब पौने २ बजेबाट लागेको आगो दमकल, इलाका प्रहरी कार्यालय भण्डारको टोली र स्थानीयवासीको सहयोगमा डेढ घण्टापछि निभाइएको थियो ।