धनगढी । नेकपा (मसाल) का महामन्त्री मोहनविक्रम सिंहले नेकपा (एमाले) को नेतृत्व भारतीय संस्थापन पक्षलाई खुशी पारेर उनीहरुकै हितमा काम गर्न प्रयत्शील रहेको आरोप लगाउनुभएको छ ।
राष्ट्रिय जनमोर्चा, सुदूरपश्चि प्रदेश समितिले धनगढीमा आयोजना गरेको पत्रकार सम्मेलनमा बोल्दै महामन्त्री सिंहले एमाले नेतृत्वमा व्यक्तिवादी प्रवृत्ति र फासिवादको लक्षण देखिएको बताउनुभयो ।
‘लामो समयदेखि नेकपा एमालेको नेतृत्व भारतीय संस्थापन पक्षलाई खुशी पारेर उनीहरूको हित अनुकूल काम गरि रहेको छ र त्यसैको बलमा सत्ता प्राप्त गरेर देशलाई फासिवादको दिशातर्फ लैजान प्रयत्न गरि रहेको छ’ सिंहले भन्नुभयो, ‘नेकपा एमालेको नेतृत्वमा काफि हदसम्म व्क्तिवादी प्रवृत्ति र फासिवादका स्पष्ट लक्षण देखिईरहेकोले यस्तो प्रवृत्तिले देश र जनतालाई हित गर्न सक्दैन ।’
महामन्त्री सिंहले पत्रकारहरूको जिज्ञासालाई सम्बोधन गर्दै वर्तमान पाँचदलीय गठबन्धन देशलाई प्रतिगमनको दिशामा जानबाट रोक्नका लागि बनेको बताउनुभयो । उहाँले गठबन्धन वर्तमान राजनीतिक आवश्यकता भएको कुरामासमेत जोड दिनु भएको थियो।
एकातिर नेपालि जनताको लामो संघर्षबाट प्राप्त उपलब्धिलाई जोगाउनु पर्ने र अर्कोतर्फ वैदेशिक हस्तक्षेपका विरुद्ध संघर्ष गर्नुपर्ने वर्तमान राजनीतिक आवश्यकतालाई सन्तुलन मिलाएर पार्टीले स्ष्पष्ट राजनीतिक भूमिका खेलि रहेको सिंहको भनाई थियो ।
फरक प्रसंगमा महामन्त्री सिंहले गणतन्त्रमाथि वामपन्थी संकिर्णतावादी कोणबाट पनि विरोध भइरहेको र कतिपय पक्षले नेकपा मसालको वर्तमान भूमिकाको विषयमा ब्यापक भ्रम फैलाई रहेको बताउँदै तर उनीहरूले भ्रम फैलाएको जस्तो आफूहरुले वर्तमान गठबन्धन दलका गलत क्रियाकलाप समर्थन नगरेको बताउनुभयो ।
एमसीसी र एसपीपी स्वीकार गर्ने, नागरिकता विधेयक पास गर्ने जस्ता सत्तारुढ गठबन्धनका राष्ट्रविरोधी गतिविधिको मसालले दृढतापूर्वक विरोध गरेको र उनीहरूका गलत क्रियाकलाप विरुद्ध सडक र सदनबाट समेत आवाज उठाई रहेको सिंहले स्पष्ट पार्नुभयो ।
पत्रकार सम्मेलनको अध्यक्षता राष्ट्रिय जनमोर्चा सुदूरपश्चिम प्रदेश समितिका अध्यक्ष नन्द राज भट्ट र सञ्चालन प्रदेश समिति सदस्य डबल बोगटीले गर्नु भएको थियो ।
कार्यक्रममा राष्ट्रिय जनमोर्चाका महासचिव मनोज भट्ट, राष्ट्रिय परिषद सदस्य हरिकृष्ण पाण्ड्ये र मूल प्रवाह अखिल भारत नेपालि एकतासमाजका उपाध्यक्ष हिरा सिंह चन्द, राजमो कैलालीका अध्यक्ष जगत प्रसाद जोशीको समेत आतिथ्यता रहेको थियो ।
