काठमाडौं । पाँचदलीय गठबन्धन कार्यदल सिट बाँडफाँट मिलाउन असफल भएको छ । करिब एक महिनादेखि निरन्तर बैठक बसेपनि कार्यदलमा सहमति हुन नसकेपछि अब भोलि (बिहीबार) अन्तिम बैठक बसेर शीर्ष नेताहरुलाई भएको प्रगतिबारे जानकारी गराइने कार्यदलका एक सदस्यले बताए ।
प्रतिनिधि सभा तथा प्रदेश सभाको सिट बाँडफाँटका लागि बनेको कार्यदल आज अन्तिम बैठक बसेर सहमति जुटाउने भनेपनि सहमति नजुटेको ती नेताको भनाई छ ।
आजको बैठकमा पनि सहमति नजुटेपछि अब शीर्ष नेताहरूलाई कार्यदलमा भएको छलफल र उठेका विषयबारे भोलि ब्रिफिङ गर्ने कार्यदलका ती सदस्यले जानकारी दिए।
‘सिट बाँडफाँटका विषयमा आजपनि छलफल भयो, निर्वाचन क्षेत्र अनुसार कुरा गर्दा कतिपय क्षेत्रमा निर्विवाद भएपनि धेरै क्षेत्रमा सबैको दाबी रह्यो’ उनले भने, ‘भोलि बिहान ९ बजे कार्यदल बसेर अन्तिम होमवर्क गर्छौं र सकभर मिलाउँछौँ। तर त्यसमा पनि सहमति नजुटे दिउँसो १ बजे शीर्ष नेताहरूको बैठकमा जानकारी दिन्छौं ।’
जसपाका नेता तथा कार्यदल सदस्य रामसहाय प्रसाद यादवले १ सय ६५ निर्वाचन क्षेत्रमध्य कांग्रेस १०० बाट नझरेको बताए ।
कांग्रेस १००, माओवादी ६०, नेकपा एकीकृत समाजवादी ४०, जसपा ३२ र राष्ट्रिय जनमोर्चा २ सिटको दाबी मै रहेको उनले बताए ।
उनका अनुसार भोलि पुनः मिलाउन प्रयास गर्ने, नभए जति मिलेको छ त्यो स्वीकार गर्ने र बाँकी मिलाउन शीर्ष नेताहरूलाई कार्यदलले ब्रिफिङ गर्नेछ ।
