काठमाडौं । नेपाल र अष्ट्रेलियाबीच जलस्रोत व्यवस्थापन सहकार्यसम्बन्धी समझदारी पत्रमा हस्ताक्षर भएको छ । आज (भदौ १४) बसेको नेपाल र अष्ट्रेलियाबीचको द्विपक्षीय संयन्त्रको बैठकमा समझदारी पत्रमा हस्ताक्षर भएको हो ।
अष्ट्रेलिया सरकार परराष्ट्र तथा व्यापार मन्त्रालय र नेपाल सरकार परराष्ट्र मन्त्रालयबीचको संयन्त्रको बैठक आज अष्ट्रेलियाको क्यानबेरामा बसेको हो ।
बैठकको अवसरमा अष्ट्रेलियाली परराष्ट्र मन्त्रालयका सचिव जान एडम्स र नेपाल सरकारका जल तथा उर्जा आयोग सचिवालयका सचिव दिनेशकुमार घिमिरेले अष्ट्रेलिया–नेपाल जलश्रोत व्यवस्थापन सहकार्यको समझदारीपत्रमा हस्ताक्षर गरे ।
यस समझदारीपत्र अनुसार अष्ट्रेलियाले तालिम, प्राविधिक सहयोग र अन्तर्राष्ट्रिय रुपमा प्रख्यात जलस्रोत शासन विज्ञतामा सहकार्य गर्ने जनाइएको छ । यसले हाल अष्ट्रेलियाले अन्तर्राष्ट्रिय एकीकृत पर्तवीय विकास केन्द्र (ईसिमोड) सँग गरिरहेको नेपाल सरकारको दिगो पुनरुत्थान, वृद्धि र रोजगारी प्रवर्धनका लागि हरित, पुनरुत्थानशील र समावेशी विकास (ग्रीड) तर्फको प्रस्थान लक्ष्य अनुरुप, सीमापार जलाधार क्षेत्र व्यवस्थापन, जलवायु कृयाकलापको स्थानीयकरण, हरित जीविकोपार्जन प्रवर्धन कार्यलाई पनि सघाउने छ ।
द्विपक्षीय संयन्त्रको बैठक अष्ट्रेलियाका तर्फबाट जीयोस्ट्रेटेजीक ग्रुपका डेपुटी सेक्रेटरी जस्टीन हेहर्श्ट र नेपालका तर्फबाट परराष्ट्र सचिव भरतराज पौड्यालको सह–अध्यक्ष्यता सञ्चालन भएको थियो।
डेपुटी सेक्रेटरी हेहर्श्टले उक्त बैठक सञ्चालन गर्न पाउँदा खुशी व्यक्त गर्दै सचिव पौड्यालको नेतृत्वको नेपाली टोलीलाई अष्ट्रेलिया यात्रा गरेकोमा धन्याबाद ज्ञापन गरे। डेपुटी सेक्रेटरी हेहर्श्टले १ लाख २० हजार भन्दा बढी नेपालीहरुले अष्ट्रेलियालाई आफ्नो घर मानेको र यसले अष्ट्रेलिया र नेपालबीच बलियो जनस्तरको सम्बन्ध स्थापना गरेको बताए।
अष्ट्रेलिया सरकार परराष्ट्र तथा व्यापार मन्त्रालय र नेपाल सरकार परराष्ट्र मन्त्रालय बिचको द्विपक्षीय संयन्त्रको स्थापना विसं २०७४ भएको हो र यस अघिको बैठक विसं २०७५ मा काठमाडौंमा भएको थियो ।
