जनकपुरधाम । जनकपुरधाममा चुरे संरक्षण अभियन्ता र प्रहरीबीच झडप भएको छ । सिरहाको चोहर्वास्थित मारुती सिमेन्ट उद्योगले सरकारकै संरक्षणमा सरकारी जमिन कब्जा गरेको भन्दै चुरे संरक्षणकर्मी आन्दोलित भएका हुन् ।
बुधबार उद्योग, पर्यटन तथा वन मन्त्रालयले मारुती सिमेन्ट उद्योगले सरकारी जमिन कब्जा गरे–नगरेको विषयमा निष्कर्ष नै ननिकालि प्रतिवेदन सार्वजनिक गरेको भन्दै मधेश प्रदेशका मुख्यमन्त्री लालबाबु राउतको पुत्ला दहन गरेका थिए । त्यस क्रममा चुरे तथा वनजंगल संरक्षण अभियानी (सुकुम्बासी) र प्रहरीबीच झडप भएको हो ।
झडपबाट प्रहरीले १०८ जना चुरे अभियानीलाई पक्राउ गरेको छ । झडपको क्रममा एकजना प्रहरी जवान र केही आन्दोलनकारी घाइते भएका छन्।
पूर्वनिर्धारित कार्यक्रम अनुसार मुख्यमन्त्रीको पुत्ला दहन र मुख्यमन्त्री कार्यालयमा तालाबन्दी गर्ने क्रममा झडप भएको हो ।
मारुती सिमेन्टले अतिक्रमण गरेको वनको जग्गा फिर्ता गर्नुपर्ने, तराई मधेशका दलित भूमिहीन सुकुम्वासी र अव्यवस्थित बसोवासीलाई उठिबास लगाउने निर्णय खारेज गर्नुपर्ने लगायतका माग राखी चुरे संरक्षणकर्मी आन्दोलनरत छन् ।
