काठमाडौं । आगामी प्रदेशसभा र प्रतिनिधिसभा निर्वाचनको सिट बाँडफाँडबारे टुंगो लगाउन बसेको पाँचदलीय गठबन्धनको बैठक बिनानिष्कर्ष सकिएको छ ।
कार्यदल र शीर्ष नेताहरुबीच सो विषयमा टुंगो लगाउने गरी मंगलबार (आज) अपराह्न प्रधानमन्त्री निवास बालुवाटारमा बसेको बैठक पनि बिना सहमती टुंगिएको हो ।
कार्यदलका संयोजक कृष्णप्रसाद सिटौला अनुपस्थित भएपछि केहीबेर छलफल गरेर बैठक भोली अपरान्ह ५ बजे बस्ने गरी सकिएको राष्ट्रिय जनमोर्चाका नेता हिमलाल पुरीले जानकारी दिनु भयो ।
उहाँले २०७४ सालको प्रदेशसभा र प्रतिनिधि सभा निर्वाचन, हालै सम्पन्न स्थानीय तह निर्वाचन र दलहरुले जित्ने ठाउँलाई समेत आधार बनाएर सिट बाँडफाँड गर्ने विषयमा छलफल भइरहेको र भदौ ९ गते बिहीबार भित्र त्यसलाई टुंगोमा पुर्याउने गरी गठबन्धनमा आवद्ध दलका नेताहरुबीच छलफल भइरहेको बताउनु भयो ।
नेता पुरीले भन्नु भयो, ‘आज निष्कर्षमा पुग्न सकिएन । कार्यदलको संयोजक पनि हुनु भएन आज । त्यसले गर्दाखेरी हाम्रो छलफल चाहिँ जारी रह्यो । आज निष्कर्षमा पुग्न सकेन । भोलि फेरि बैठक बस्ने तय भएको छ । भोलि पाँच बजे बैठक छ । त्यसमा छलफल भएर हामी अब टुंग्याउँछौं । ९ गतेभित्र यसलाई टुंग्याउने प्रयत्न गर्छौं । हामीले त्यसलाई समग्र रुपमा छलफल गरिराखेको छौं । सिट बाँडफाँडको आधारहरुको विषयमा छलफल भइरहेको छ ।’
उहाँले थप्नुभयो, ‘निर्वाचनको प्रत्येक्षतर्फको एउटा आधार छ । समानुपातिकको अर्को आधार छ । स्थानीय तह निर्वाचनलाई पनि आधार बनाउने कुरा गरिराखेका छौं । विभिन्न आधारहरुको विषयमा छलफल गरिराखेका छौं । छलफल सकारात्मक रुपमा अगाडि बढिराखेको छ । भोलि पनि बैठक हुन्छ ।’
गठबन्धन दलहरुले प्रदेशसभा र प्रतिनिधिसभा निर्वाचनको सिट बाँडफाँडका लागि कांग्रेस नेता सिटौला नेतृत्वको कार्यदल बनाएका छन्। तर कार्य दलका संयोजक सिटौला बिरामी भएका कारण आजको बैठकमा उपस्थित हुन सक्नु भएन ।
