काठमाडौं । पाँचदलीय गठबन्धनमा राष्ट्रिय जनमोर्चाले आफ्नो माग पेश गरेको छ । सिट बाँडफाँट कार्यदलका संयोजक कृष्ण सिटौलालाई मागपत्र पेश गरेर राजमोले सिट दाबी गरेको हो ।
कार्यदलका एक सदस्यका अनुसार अन्य दलले बाहिर मिडियामा दाबी प्रस्तुत गरिरहँदा र नेताहरुले व्यक्तिपिच्छे सिट माग गरिरहँदा राष्ट्रिय जनमोर्चाले भने कार्यदलका संयोजकसमक्ष दाबी पेश गरेको हो । यद्यपी राजमो नेताहरुले यसबारेमा औपचारिक रुपमा केही बताएका छैनन् ।
स्रोतका अनुसार राजमोले बागलुङको क्षेत्र नं १ र प्युठानमा प्रतिनिधिसभा सदस्यमा दाबी गरेको छ । एक सिट मात्रै रहेको प्युठानमा बहालवाला सांसद राजमोको तर्फबाट दुर्गा पौडेल हुनुहुन्छ भने बागलुङमा राजमो सांगठनिक रुपमा बलियो छ ।
यस्तै, प्रदेश सभातर्फ राजमोले बागलुङ, अर्घाखाँची, गुल्मी, दाङ, काठमाडौं र डोटीमा एक/एक सिट दाबी गरेको छ । यस्तै, कर्णालीको कुनै एक क्षेत्रमा दाबी रहने राजमो स्रोतले बताएको छ ।
कार्यदलमा दाबी पेश गरिएको निर्वाचन क्षेत्र र सिट आफूहरुको बटमलाइन भएको राजमो स्रोतले बताएको छ । सो विषयमा गठबन्धनको शीर्ष तहमा पनि छलफल भइरहेको बताइएको छ ।
‘बागलुङ र प्युठानको प्रतिनिधि सभा सदस्य हाम्रो बटमलाइन हो । प्रदेशसभा तर्फ पनि हामीले अनावश्यक र संगठन नभएको ठाउँमा दाबी गर्दैनौं । औचित्यपूर्ण ढंगले गठबन्धनमा हामी दाबी पेश गर्छौँ । सो विषयमा गठबन्धनको शीर्ष तहमा पनि छलफल भइरहेको छ ’ स्रोतले भन्यो ।
पाँचदलीय गठबन्धनले सिट बाँडफाँटसम्बन्धी प्रतिवेदन पेश गर्न पाँचै दलबाट दुई/दुई जना र नेपाली कांग्रेसबाट संयोजकसहित तीन जना रहेन गरी ११ सदस्यीय कार्यदल गठन गरेको थियो ।
कार्यदलको संयोजक कांग्रेस नेता कृष्ण सिटौला हुनुहुन्छ । राजमोबाट कार्यदलमा सचिव हिमलाल पुरी र नेतआ आनन्द शर्मा रहनुभएको छ ।
कार्यदलले साउन मसान्तभित्र काम सक्ने म्यान्डेट पाएपनि सिट बाँडफाँटको टुंगो लाग्न सकेको छैन ।
