बागलुङ । राष्ट्रिय जनमोर्चाका अध्यक्ष चित्रबहादुर केसीले सत्ताका लागि ठूला राजनीतिक दलहरु भारतको इशारामा नाचेको आरोप लगाउनुभएको छ ।
भारतीयलाई नागरिकता दिन संसदबाट नागरिकता विधेयक पारित गरिएको आरोप लगाउँदै केसीले नेपालका ठूला दल र शीर्ष नेताहरु भारतीयको इशारामा चलेको कटाक्ष गर्नुभएको हो । नेपाललाई श्रीलंका, फिजी जस्तो बनाउन नागरिकता विधेयक ल्याइएको उहाँको आरोप छ ।
पार्टी कामको शिलशिलामा बागलुङ आएका केसीले शुक्रबार राजमो बागलुङले आयोजना गरेको पत्रकार सम्मेलनमा एमसीसी, नागरिकता विधेयक जस्ता विषयमा राजमोले गठबन्धनमा फरक मत राखेको बताउनुभयो ।
केसीले भन्नुभयो, ‘भारतमा गएका हाम्रा छोरी चेलीले ७ वर्षमा नागरिकताको प्रक्रिया थाल्न पाउने, बुहारीलाई सिंदुरसँगै नागरिकता चाहिने ? यो विषयमा भारतीयको गम्भीर चलखेल छ ।’
अध्यक्ष केसीले प्रतिगमन हुन नदिन नेपाली कांग्रेससँग विमतीका बावजुद गठबन्धन गर्नुपरेको बताउनुभयो । नेकपा एमालेका अध्यक्ष केपी ओलीको प्रतिगमनलाई परास्त गर्न कांग्रेसलगायतका दलसँग सहकार्य गर्नुपरेको केसीको भनाई थियो ।
गणतन्त्र र धर्मनिरपेक्षताको सवालमा एमालेभन्दा कांग्रेस इमान्दार रहेको केसीको भनाई थियो ।
‘पञ्चायत फाल्न कांग्रेसकै साथ चाहियो, गणतन्त्र ल्याउन कांग्रेस नै चाहियो, त्यसैले गणतन्त्र र धर्म निरपेक्षता जोगाउन पनि गठबन्धन बनाउनु परेको हो,’ केसीले भने, ‘धर्म निरपेक्षता र गणतन्त्रको मामिलामा वामपन्थी भए पनि एमालेभन्दा कांग्रेस इमानदार देखियो ।’
उहाँले केपी ओलीले दुई दुई पटक संसद विघटन गरेर प्रतिगमन ल्याउन खोजेको जिकीर गर्नुभयो । ओलीका कारण धर्मनिरपेक्षता र गणतन्त्र अहिले पनि खतरामा रहेको उहाँको भनाई थियो ।
‘२०७४ सालमा हामी वामपन्थी भनेरै लागेका थियौं, दुइ तिहाइ वामपन्थीको संसद पटकपटक हत्या गरियो,’ केसीले भन्नुभयो, ‘संविधानमा व्यवस्था नभएको विघटन रोज्ने, अध्यादेशबाट देश चलाउनेको अझै पनि केही भर छैन ।’
उहाँले गठबन्धनका नाममा देश र जनताविरुद्धका एजेण्डालाई जनमोर्चाले समर्थन नगर्ने बरु एक्लै चुनावमा जाने स्पष्ट पार्नुभयो ।
