गिरीप्रसाद बुढा, मुसिकोट ।
रुकुम साहित्यमालाको पन्चानब्बेऔँ शृङ्खलामा पाँच लाख रुपियाबराबरको योगमाया स्मृति साहित्य पुरस्कारको घोषणा गर्दै सम्पन्न भएको छ ।
राप्ती साहित्य परिषद् रुकुमको २०७९ साउन ३० गते मुसिकोट–४ सोलावाङमा सम्पन्न पन्चानब्बेऔँ शृङ्खलामा सो पुरस्कार घोषणा गरिएको हो । परिषद् रुकुम पश्चिमका सल्लाहकार पूर्ण ओलीकी आमा योगमाया ओलीको निधन भएको पैतालिसौँ दिनको सो पुरस्कार घोषणा गरिएको थियो ।
कार्यक्रममा बोल्दै प्रमुख अतिथि साहित्यकार गिरीप्रसाद बुढाले मृत्यु तथा जन्म संस्कारमा फजुल खर्च नगरी आफूसँग भएको रकम यसरी समाजलाई अगाडि बढाउने सिर्जनशील कार्यमा लगाएर ओली परिवारले समाजलाई राम्रो शिक्षा दिएको विचार व्यक्त गर्नुभयो ।
प्रगतिशील लेखक सङ्घका केन्द्रीय सचिव गिरीप्रसाद बुढा प्रमुख अतिथि रहनुभएको सो कार्यक्रममा विशेष अतिथि परिषद्का केन्द्रीय सदस्य पूर्ण ओली तथा अन्य अतिथिहरू मृतक योगमाया ओलीका पति यक्कबहादुर ओली, साहित्यकार एक्कबहादुर केसी, परिषद्का जिल्ला सल्लाहकार तथा आहा सञ्चार साप्ताहिकका प्रकाशक तथा सम्पादक मेगराज खड्का, प्राइम टाइम टेलिभिजनका संवाददाता भरत चन्दलगायतका हुनुहुन्थ्यो ।
ओली परिवारका साथै अन्य आफन्तजनको पनि उल्लेखनीय उपस्थिति रहेको उक्त कार्यक्रममा ओली परिवारको तर्फबाट साहित्यकार पूर्ण ओलीले श्रद्धाञ्जली मन्तव्य राख्दै परिषद्को रुकुम पश्चिम शाखामा रहने गरी रु पाँच लाखबराबरको योगमाया स्मृति लोकसाहित्य पुरस्कार नामक अक्षयकोषको घोषणा गर्नुभएको थियो ।
यस अक्षयकोषबाट प्राप्त ब्याजबाट ७० प्रतिशत साहित्यमा योगदान दिने व्यक्तित्वलाई पुरस्कृत गर्ने तथा बाँकी ३० प्रतिशत गाउँकै विद्यालयमा अध्ययनरत दुई जना जेहेन्दार विद्यार्थीलाई छात्रवृत्ति दिने कार्यक्रममा जानकारी दिइएको थियो ।
योगमायाले जीवनमा गरेका सामाजिक कार्य, समाजमा उहाँले पु¥याउनुभएको योगदानका साथै उहाँमा अन्तरनिहित प्रगतिशील विचारको चर्चा गर्दै श्रद्धाञ्जली मन्तव्य राखिएको उक्त कार्यक्रममा कवि–कलाकारहरूले मृतकको सम्झनामा रचनासमेत वाचन गरिएको थियो ।
शोकसभाको रूपमा आयोजित उक्त कार्यक्रम परिषद्का जिल्ला अध्यक्ष मनलाल ओलीको अध्यक्षता, सल्लाहकार मेगराज खड्काले स्वागत तथा अर्का सल्लाहकार सहजीकरण मुकुन्दप्रसाद शर्माले गर्नुभएको थियो ।
