पोखरा । गण्डकी प्रदेश सांसद पियारी थापाले प्रदेश सरकारले अचाक्ली कर बढाएको भन्दै आपत्ति जनाउनुभएको छ ।
बुधबार प्रदेश सभाको शून्य समयमा बोल्दै थापाले गण्डकी सरकारले घरजग्गा रजिस्ट्रेसनमा ४०० प्रतिशतसम्म र सवारी साधनमा पनि अचाक्ली कर बढाएको बताउनुभयो ।
राष्ट्रिय जनमोर्चाका सांसद थापाले महंगी र कर थुपारेर प्रदेश सरकारले जनताको ढाड सेक्ने काम गरेको आरोप लगाउनुभयो ।
‘जनता भन्छन् महंगी बढ्यो महंगी घटाउ हामीलाई राहत देउ, सरकार भन्छ महंगी बढेकै छैन । जबकि बजारभाउ हेर्ने हो भने दैनिक उपभोग्य वस्तुको मूल्य किनिनसक्नु छ । सरकारको अनुगमन सयन्त्र नै फितलो छ । विश्वसनीय भएन । जनताको चुलो चौको बल्ने स्थिति भयावह छ’ थापाले भन्नुभयो, ‘सरकारी सयन्त्रको अनुगमनको पनि अनुगमन आवश्यकता देखियो । जनतालाई तत्कालै राहत दिने विषयमा गम्भीर ध्यानाकर्षण होस् ।’
सांसद थापाले गण्डकी प्रदेश ‘कर प्रदेश’ का रुपमा चिनिन थालेको बताउनुभयो । उहाँले घरजग्गा रजिस्ट्रेसन र सवारी साधनमा बढाइएको कर घटाउन माग गर्नुभयो ।
सांसद थापाले भन्नुभयो, ‘गण्डकी प्रदेश आज जनताहरु कर प्रदेश भन्न थालेका छन् । हामीले अत्यन्तै मेहनत गरी राखेको गण्डकी प्रदेश आज कर प्रदेशको नामले चिनिन थालेको छ । यो विषय गम्भीर हो । सवारी साधन घर जग्गा रजिस्ट्रेसन शुल्कमा भएको ४०० प्रतिशतभन्दा बढी कर कुनैपनि हालतमा जनपक्षीय हुनसक्दैन । जनताले कर तिर्नुपर्छ राजस्वको मुख्य स्रोत कर हो भनेर जनतामाथिको राज्यको दोहन तत्काल बन्द गरियोस् ।’
उहाँले चौतर्फी विरोधपछि सवारीसाधनको करमा केही हेरफेर गरिएको भन्दै विरोध आएपछि मात्रै पछि हट्ने होइन यस्ता कदम चाल्नु अघिनै हेक्का पुर्याउनुपर्ने बताउनुभयो ।
साथै, मूल्यवृद्धि नियन्त्रण र कर समायोजनको विषयमा सरकारले गरेको कार्य संसदलाई जानकारी गराउन पनि माग गर्नुभयो ।
