काठमाडौं । फोहोर लिएर बन्चरेडाँडा ल्याण्डफिल साइटमा पुगेका एक दर्जन बढी गाडी तोडफोड गर्नेमाथि काठमाडौं महानगरपालिकाले कारबाही गर्ने भएको छ ।
महानगरपालिकाका मेयर बालेन्द्र शाहले फोहोर व्यवस्थापनका गाडी तोडफोड गर्नेमाथि कडा कारबाही गर्ने चेतावनी दिनुभएको हो । आइतबार राति महानगरका २१ वटा गाडी तोडफोड भएपछि मेयर शाहको यस्तो चेतावनी आएको हो ।
वर्षौँदेखि अव्यवस्थित भएको फोहोरलाई व्यवस्थित गर्दा चरणबद्धरुपमा नयाँ नयाँ किसिमका व्यवधान ल्याइने प्रयास भइरहेको मेयर शाहले बताउनुभएको छ ।
शाहले सामाजिक सञ्जालमा लेख्नुभएको छ ‘हिजो राति फोहोर व्यवस्थापनमा प्रयोग हुने साधनहरुको तोडफोड भएको छ। फोहोर व्यवस्थापनलाई निष्कर्षमा पुग्न नदिन गरिएको पछिल्लो चलखेलका रुपमा हामीले यसलाई लिएका छौँ।’
उहाँले तोडफोड गरिएका गाडीको तस्बिर राख्दै कानुनीरुपमा पनि फोहोर बोक्ने साधनहरुको तोडफोड जघन्य अपराध हो भन्दै कडा कारबाही गर्ने चेतावनी दिनुभएको हो ।
‘कानुन बमोजिम अपराधीहरुलाई कडा भन्दा कडा कारबाही हुनै पर्छ भन्नेमा महानगर स्पष्ट छ’ उहाँले भन्नुभएको छ, ‘ तोडफोड गर्नेहरुबाट नै यसको भरपाइ तथा क्षतिपूर्ति गराउनु पर्छ। यसका लागि महानगरले सम्बन्धित संयन्त्र तथा निकायहरुसँग समन्वय गरिरहेको छ।’
शाहले केही व्यक्ति वा समूहको स्वार्थपूर्तिका लागि लाखौँ नागरिक तथा २१ वटा पालिकाहरुको फोहोरलाई अव्यवस्थित र असरल्ल पार्न नसकिने पनि स्पष्ट पार्नुभएको छ ।
