काठमाडौं । पाँचदलीय गठबन्धनले आगामी प्रतिनिधि सभा र प्रदेश सभाको निर्वाचनमा सिट बाँडफाँडका लागि समिति बनाएको छ ।
शुक्रबार प्रधानमन्त्रीको सरकारी निवास बालुवाटारमा बसेको गठबन्धनको बैठकले ११ सदस्यीय समिति बनाएको हो ।
समितिमा नेपाली कांग्रेस, नेकपा माओवादी केन्द्र, एकीकृत समाजवादी, जनता समाजवादी र राष्ट्रिय जनमोर्चाबाट ११ सदस्य राखिएको छ ।
जसमा कांग्रेसबाट कृष्ण सिटौला, ज्ञानेन्द्रबहादुर कार्की र गगन थापा, नेकपा माओवादी केन्द्रबाट देव गुरुङ र वर्षमान पुन, नेकपा एकीकृत समाजवादीबाट उपाध्यक्ष प्रमेश हमाल र महासचिव बेदुराम भुसाल, जनता समाजवादी पार्टी (जसपा)बाट रकम चेम्जोङ र रामसहायप्रसाद यादव तथा राष्ट्रिय जनमोर्चाबाट सचिव हिमलाल पुरी र नेता आनन्द शर्मा सदस्य रहनुभएको छ ।
समितिलाई भदौभित्र सिट बाँडफाँटको निर्णयसहित प्रतिवेदन दिन भनिएको छ ।
सरकारले आगामी मंसिर ४ गते प्रतिनिधि सभा र प्रदेश सभाको निपर्वाचन तय गरेको छ ।
साउनभित्रै सिट बाँडफाँट गर्न समयसिमा
समितिलाई साउन महिनाभित्रै सिट बाँडफाँटको मोडल प्रस्ताव गर्ने समयसीमा दिइएको छ ।
शीर्ष नेताहरुको बैठकले साउन मसान्तसम्म सिट बाँडफाँटको प्रस्ताव पेश गर्ने समयसीमा दिइएको छ।
प्रतिनिधि सभाका १ सय ६५ र प्रदेश सभाका ३ सय ३० सिटका लागि गठबन्धनबीच भागबण्डा हुनेछ ।
स्थानीय तह निर्वाचनको कमजोरी नदोहोर्याउने प्रतिवद्धता
बैठकले गएको स्थानीय तहमा भएको कमजोरी नदोहोर्याउने प्रतिवद्धता जाहेर गरिएको छ ।
यसअघि वैशाख ३० गते स्थानीय तहको निर्वाचनको लागि पनि कांग्रेसका वरिष्ठ नेता रामचन्द्र पौडेलको नेतृत्वमा उच्चस्तरीय राजनीतिक संयन्त्र बनाइएको थियो। त्यो संयन्त्रले स्थानीय तहको तालमेल मोडालिटी बनाएको थियो।
तर, ३ सय स्थानीय तहमा मात्र तालमेल भएको, केही तालमेलमा गठबन्धनभित्र असहयोग भएपछि अहिले भने सुरुदेखि नै गठबन्धनले बनाएको समितिमार्फत निर्वाचन क्षेत्र बाँड्ने तयारी छ।
