काठमाडौं । साउदी अरबको एउटा अदालतले पत्रकार जमल खसोग्गीको हत्यामा संलग्न पाँच जनालाई मृत्युदण्डको सजाय सुनाएको छ । थप तीन जनालई २४ वर्षको जेल सजाय सुनाएको छ ।

साउदी सरकारका आलोचक खसोग्गीको गत वर्ष टर्कीस्थित साउदी अरबको महावाणिज्यदूतको कार्यालयमा हत्या भएको थियो । साउदीका अभियोजनकर्ता ‘रग अपरेसन’ मा खगोस्सी मारिएको र त्यसमा सहभागी रहेका ११ जनमाथि मुद्दा चलाइएको बताएका छन् । उनको हत्यापछि साउदी सरकारको विश्वव्यापीरुपमा आलोचना भएको थियो ।

युएनका स्पेशल र्यापोटर एग्नेस कलामर्ड लगायत अन्य अन्तर्राष्ट्रिय अभियन्ताहरुले सो हत्या प्रकरणमा साउदी राजकुमार मोहम्मद विन सलमानमाथि पनि छानविन हुनुपर्ने माग गर्दै आएका छन् । राजकुमार सलमानले आफ्नो कुनै संलग्नता नरहेको दाबी गर्दै आएका छन् ।