प्रकाश थापा मगर
काठमाडौँ । अखिल नेपाल महिला संघकी अध्यक्ष तथा राष्ट्रिय जनमोर्चाकी पूर्व सांसद मीना पुनले सीमा अतिक्रमणको विषयलाई लिएर संयुक्त राष्ट्रसंघ जान सकिने बताउनुभएको छ । राष्ट्रिय जनमोर्चा र रक्तिम सांस्कतिक अभियानका काठमाडौँ जिल्ला समितिले सुरु गरेको एकमहिने कार्यक्रमअन्तर्गत शनिबार काठमाडौंको गोङ्गबुमा आयोजित सभामा प्रमुख अतिथिको आसनबाट सम्बोधन गर्दै उहाँले सो धारणा व्यक्त गर्नुभएको हो ।
‘देश ठुलो र सानो भनेर हुँदैन’ पुनले अगाडि भन्नुभयो– ‘क्यामरुन सानो देश थियो, नाइजेरिया ठुलो देश । तर क्यामरुनले सीमा अतिक्रमणको विषय संयुक्त राष्ट्रसंघमा पु-यायो र अन्ततः आफ्नो अतिक्रमित भूमि फिर्ता पाएरै छाड्यो ।’ सर्वप्रथम कूटनीतिक प्रक्रियाबाट समस्या समाधान गर्नुपर्ने, यदि भारतको प्रतिक्रिया सकारात्मक नदेखिए सीमा अतिक्रमणलाई अन्तर्राष्ट्रियकरण गर्दै संयुक्त राष्ट्र सङ्घमा जान सकिने उहाँको तर्क थियो ।
नेपालले सीमा अतिक्रमणको सवालमा कूटनीतिक नोट पठाउनु सही कदम भएको बताउँदै उहाँले भन्नुभयो– ‘तर भारतले यस मामिलामा नेपालसित वार्ता गर्न नचाहेको देखिन्छ ।’ ‘एकातिर, राष्ट्रियताको मामिलामा देशमा राष्ट्रिय सहमति कायम भएको र अर्कातिर, केन्द्रमा दुईतिहाइ बहुमतको बलियो सरकार भएकाले भारतले सीमा विवादको सन्दर्भमा वार्ताको टेबुलमा आउन नचाहेको देखिन्छ’ उहाँको थप स्पष्टोक्ति थियो । मन्तव्यको क्रममा उहाँले लिम्पियाधुरादेखि कालापानी हुँदै लिपुलेकसम्म भारतद्वारा अतिक्रमण भएकोबारे नेपालसित ठोस प्रमाण भएकाले सरकार दृढतापूर्वक अघि बढ्नुपर्ने बताउनुभयो । उहाँले तत्कालका लागि भारतद्वारा अतिक्रमित भूमिमा नेपाली सुरक्षाकर्मी तैनाथ गर्न सरकारसित आग्रह गर्नुभयो ।
कार्यक्रममा मन्तव्य राख्दै अखिल नेपाल टे«ड युनियन महासङ्घ (अन्टुक) का अध्यक्ष नारायण सापकोटाले सरकारले विस्तारै विस्तारै स्वतन्त्र परराष्ट्र नीति परित्याग गर्दै गएको बताउनुभयो । ‘उत्तर कोरियाको पुँजी लगानी फिर्ता गर्ने तथा उनीहरूका नागरिकलाई नेपालबाट निस्कासन गर्नु एउटा उदाहरण हो’ सापकोटाले अगाडि भन्नुभयो– ‘लामो समयदेखि सीमा अतिक्रमण भइसकेपछि पनि भारतीय राजदूतलाई बोलाएर आफ्नो पक्ष नराख्नु वा प्रधानमन्त्री ओलीले भारतीय प्रधानमन्त्रीसित फोन वार्तासमेत नगर्नु यस्ता केही उदाहरण हुन् ।’ उहाँले परराष्ट्र नीतिको सन्दर्भमा यी कमजोरीलाई आपत्तिजनक पनि बताउनुभयो ।
अखिल नेपाल कानुन व्यवसायी सङ्घका महासचिव लक्ष्मणदेव पाण्डेले कार्यक्रममा सम्बोधन गर्दै सीमा अतिक्रमण भएको तमाम प्रमाण हुँदाहुँदै पनि नेपाल सरकारले भारतसित सशक्त रूपमा कुरा नउठाउनुका पछाडि कतै यो सरकार भारतसामु फेरि लम्पसार पर्न थालेको त होइन भन्दै आशङ्का व्यक्त गर्नुभयो । कार्यक्रममा राष्ट्रिय जनमोर्चाकी केन्द्रीय सदस्य लक्ष्मी केसीले पनि सम्बोधन गर्नुभएको थियो ।
नेकपा (मसाल) काठमाडौँका प्रवक्ता जगत्प्रसाद रेग्मीको सञ्चालन तथा राजमो काठमाडौँका विनोद फुयाँलको अध्यक्षतामा अघि बढेको सो कार्यक्रममा राजमो नेता आनन्द शर्मा, अखिल नेपाल जनजाति सम्मेलनका अध्यक्ष निमबहादुर बुढा, अखिल नेपाल युवक सङ्घका अध्यक्ष अनिलकिशोर घिमिरे, राजमो केन्द्रीय सदस्य चिन्तामणि शर्मा र राजमो काठमाडौँका अध्यक्ष झविन्द्र बेलबासेको पनि आतिथ्यता रहेको थियो ।
रक्तिम सांस्कृतिक अभियानका केन्द्रीय सल्लाहकार मधु क्षेत्रीले ‘इङ्कलाबको नारा’ शीर्षकको कविता वाचन गर्नुभएको उक्त सभामा रक्तिमका कलाकारहरूले ‘मधेशी–पहाडी’, ‘तलमा पर्यो’, ‘साम्राज्यवादलाई परास्त गरौँ’ र ‘सामन्तले नौजाल बुन्छ’ गीतमा नृत्य प्रस्तुत गरेका थिए ।
