काठमाडौं । नेकपा (एकीकृत समाजवादी) का सम्मानित नेता एवं पूर्वप्रधानमन्त्री झलनाथ खनालले चुनावमा भागबण्डा नमिले पाँचदलीय गठबन्धन नरहने बताउनुभएको छ ।
एक रेडियोलाई बुधबार दिएको अन्तर्वार्तामा नेता खनालले नेपाली कांग्रेसले सय सिट माग्दैमा नपाउने भन्दै दम्भ गरे कांग्रेसको सिङ भाँचिने चेतावनी दिनुभयो ।
नेकपा (एकीकृत समाजवादी) भित्र वाम गठबन्धनका पक्षधर खनालले कांग्रेससँग जसरी पनि गठबन्धन गर्नुपर्छ भन्ने पक्षमा आफू नरहेको बताउनुभयो ।
‘गठबन्धन गर्ने हो भने सम्मानजनक ढंगले सिट तालमेल हुनुपर्छ । कसैले माग्दैमा दिने भन्ने कुरा हुँदैन । आवश्यकता र औचित्य के हो ? कांग्रेसले दम्भ गर्यो भने सिङ भाँच्चिन्छन्’ खनालले भन्नुभयो, ‘अहिले हामीले गठबन्धन टुटाउने सोचेका छैनौं । भागबन्डा मिलेन भने गठबन्धन रहँदैन । जसरी पनि गठबन्धन गर्नुपर्छ भन्ने केही छैन ।’
खनालले विचार, नीति र कार्यदिशा मिलेको खण्डमा नेकपा (माओवादी केन्द्र) सँग पार्टी एकता हुनसक्ने बताउनुभयो ।
समाजवादका पक्षधर शक्ति एक भएर अघि बढ्नुपर्ने ऐतिहासिक आवश्यकता रहेको खनालको भनाई छ ।
नेकपा एमालेका अध्यक्ष केपी ओलीसँग पनि राजनीतिक संवाद जरुरी भएको खनालले बताउनुभयो ।
‘अब कसैले पनि ढोका बन्द गरेर बस्नु जरुरी छैन । यो वादे वादे जयते तत्त्वबोध भनेजस्तै हो’ खनालले भन्नुभयो, ‘वामपन्थी एकता आजको आवश्यकता हो । तर मैले यो गठबन्धन छाड्नुपर्छ पनि भनेको छैन ।’
