कपिलवस्तु । अखिल (छैठौं) की नेत्री अस्मिता खनालको निधन भएको ७औं दिनको दिन अखिल (छैठौं) कपिलवस्तुले श्रद्धाञ्जली सभाको आयोजना गरेको छ ।
कपिलवस्तुको शिवराज नगरपालिका वार्ड नम्बर ३ नयाँ बस्ती निवासी अखिल (छैठौं) का पूर्व जिल्ला सदस्य अस्मिताको निवासमा मंगलबार श्रद्धाञ्जली सभा आयोजना गरिएको हो ।
श्रद्धाञ्जली सभालाई प्रमुख वक्ताको रुपमा अखिल (छैठौं) का केन्द्रीय सदस्य टेकराज भुसालले सम्बोधन गर्नुभएको थियो ।
त्यस क्रममा भुसालले खनालको असामयिक निधनबाट संगठनलाई अपूरणीय क्षति पुगेको बताउनुभयो । उहाँले संगठनमा देखाएको निष्ठा, सक्रियताबाट विद्यार्थीहरुले महत्वपूर्ण पाठ सिक्नुपर्ने भन्दै खनालको अखिल (छैठौं) र विद्यार्थी आन्दोलनमा अतुलनीय योगदान रहेको बताउनुभयो।
त्यस्तै अखिल नेपाल टेड्र युनियन महासंघ (अन्टुक) का केन्द्रीय सदस्य केयर सिंह अदैले दिवंगत खनालप्रति श्रद्धाञ्जली र शोकाकूल परिवारजनप्रति हार्दिक समवेदना व्यक्त गर्नुभएको थियो ।
श्रद्धाञ्जली सभामा राष्ट्रिय जनमोर्चा कपिलवस्तुका कोषाध्यक्ष चेतनारायण खनाल, अस्मिताका बुवा श्याम प्रकाश खनाल, हजुरआमा इन्द्र कला खनाल लगायतको आतिथ्यता रहेको थियो।
श्रद्धाञ्जली सभा अखिल (छैठौं) कपिलवस्तु अध्यक्ष सन्जिला बुढा मगरको अध्यक्षता र सचिव टिना अदैको सञ्चालनमा सम्पन्न भएको थियो।
१९ वर्षीय खनालको असार १५ गते जिल्लाको शिवराज नगरपालिका ३ खरेन्द्रपुरमा सडकको किनारमा रोकिराखेको ट्याक्टरमा पश्चिमबाट पूर्वतर्फ जाँदै गरेको मोटरसाइकल ठोक्किँदा निधन भएको थियो ।
