कमल पौडेल, खलङ्गा ।
राष्ट्रिय जनमोर्चा प्युठानले सदरमुकाम खलङ्गास्थित लोकतान्त्रिक चोकमा विरोधसभा सम्पन्न गरेको छ । महङ्गी, भ्रष्टाचार, महिला हिंसा, कृषिमल, बिउ र पाठ्यपुस्तक अभाव विरुद्ध साङ्केतिक विरोध प्रदर्शन गर्ने केन्द्रीय कार्यक्रमानुसार २०७९ असार १९ गते आइतबार सो कार्यक्रम सम्पन्न भएको हो ।
विरोधसभाको प्रमुख अतिथि राजमो लुम्बिनी प्रदेशका अध्यक्ष बोमबहादुर खत्री हुनुहुन्थ्यो । सो अवसरमा सम्बोधन गर्दै उहाँले सरकारले जनताप्रतिको उत्तरदायी व्यवहार गर्नुपर्ने आवश्यकतामा जोड दिनुभयो ।
‘महङ्गी नियन्त्रण गर्नु, भ्रष्टाचार निर्मूल पार्नु, महिला हिंसा न्यूनीकरण गर्नु, मल, बिउ र पाठ्यपुस्तकको अभाव समाप्त पार्नु सरकारको सामान्य कर्तव्य हो’ उहाँले भन्नुभयो– ‘सरकार सञ्चालन गर्नेहरू जनताप्रतिको यस्तो कर्तव्यप्रति उदासिन हुन मिल्दैन ।’
उहाँले प्रतिगमन विरुद्ध सङ्घर्षको क्रममा गठन भएको यो सरकारप्रति राजमोको समर्थन रहे पनि सरकार गैरजिम्मेवार भएको अवस्थामा आफूहरू आन्दोलनमा उत्रिने बताउनुभयो ।
‘यो सरकार प्रतिगमन विरुद्धको आन्दोलनको क्रममा गठन भएको हो । अहिले पनि प्रतिगमनको खतरा कायमै रहेकाले यो सरकारलाई हामी अहिले पनि समर्थन गर्दछौँ’ उहाँले भन्नुभयो– ‘त्यसका साथै हामी सरकार देश र जनताको विरुद्धमा जाँदा हामी आन्दोलनमा उत्रन्छौँ ।’
नेता खत्रीले आफूहरू सरकारमा सामेल नभएकाले सकारका गलत नीतिका विरुद्ध आन्दोलन गर्नु आफूहरूको दायित्व र अधिकार दुवै भएको बताउनुभयो ।
कार्यक्रममा राजमो नेता तिलक जिसीले सम्बोधन गर्दै महङ्गी र भ्रष्टाचार तत्कालै रोक्न सरकारसित माग गर्नुभयो । उहाँले महिला हिंसा अन्त गर्न तथा मल, बिउ र पाठ्यपुस्तकको अभाव तत्कालै समाप्त गर्न सरकारको ध्यानाकर्षण पनि गराउनुभयो ।
जिल्ला उपाध्यक्ष इमानसिंह खड्काको अध्यक्षता तथा सचिव विदुर मल्लको सञ्चालनमा अघि बढेको उक्त कार्यक्रममा उपस्थित जनसमुदायलाई सहसचिव लालबहादुर रावतले सम्बोधन गर्नुभएको थियो ।
