काठमाडौं । लुम्बिनी प्रेदेशकी स्वास्थ्य राज्यमन्त्री विमला वलीले राजीनामा गरेको प्रदेश सरकारले बताइरहँदा उनले भने राजीनामा नदिएको बताएकी छन् ।

‘उहाँले राजीनामा दिइसक्नु भएको छ, मैले उहाँको राजीनामा स्वीकृत गरिसकेँ,’ बुधबार बिमलाको राजीनामाबारे संसद्लाई मुख्यमन्त्री कुलप्रसाद केसीले जानकारी गराएका थिए । तर विमलाले भने आफूले राजीनामा नदिने र सरकार आफैंले कारबाही गरेर पदमुक्त गर्न चुनौती दिएको नागरिक दैनिकले लेखेको छ ।

‘म राजीनामा दिन्नँ, तपाईंहरूले नै कारबाही गरेर पदबाट हटाउनुस् भन्नुभयो,’ स्रोतले भन्यो ‘उहाँले आफै राजीनामा नदिने भएपछि अब उहाँलाई पदमुक्त गर्ने पक्का भएको छ।’

विमलाले आफूले मन्त्री पदबाट राजीनामा दिनुपरे सांसद र पार्टीबाट समेत राजीनामा दिने धम्कीसमेत दिएकी थिइन्।

‘मलाई मन्त्री पदबाट राजीनामा दिनुपर्‍यो राजीनामा लेख्नुस् भन्न आउनु भएको थियो,’ उनले भनिन्, ‘तर मैले मन्त्रीबाट मात्रै हैन, सांसद र पार्टीबाट पनि एकैपटक राजीनामा दिन्छु भने पछि उहाँहरू जानु भएको हो।’

तर उनले आफूले राजीनामापत्रमा हस्ताक्षर गरेर कसैलाई पनि नबुझाएको तर राजीनामा दिएको भनेर कसरी भनियो ? भन्दै प्रश्न समेत गरिन्।

‘मैले राजीनामा पत्रमा कतै हस्ताक्षर गरेको छैन, तर राजनामा दिएको भनेर उहाँहरूले कसरी भन्नु भयो मलाई थाहा छैन,’ उनले भनिन् ‘तर राजीनामा दिनै परे मैले मन्त्रीबाट मात्रै दिन्नँ।’

स्रोतका अनुसार उनलाई अब मुख्यमन्त्रीले मन्त्री पदबाट हटाउने पक्का छ। तर, पदमुक्त गरेको खण्डमा भने सांसद र पार्टीबाट राजीनामा दिने तयारीमा विमला छिन् ।

जेठ अन्तिममा दाङका वाईसीएल नेता एकराज बस्नेतको घरमा गएर उनकी श्रीमती र छोरीलाई अभद्र व्यवहार गरेको आरोपपछि त्यसबारे छानबिन गर्न सरकारले समिति समेत बनाएको थियो । यहीबीच वलीले राज्यमन्त्री पदबाट राजीनामा दिएको प्रदेश सरकारले प्रचार गरेको थियो ।

पति उत्तरकुमार वलीको सडक दुर्घटनामा मृत्यु भएपछि विमला दाङ क्षेत्र नम्बर ३ ९ख० मा भएको उपनिर्वाचनमा तत्कालीन नेकपाबाट विजयी भएकी थिइन्।

तर ऋषि कट्टेलले आफ्नो पार्टीसँग नाम जुधाएको भन्दै दिएको मुद्दामा सर्वोच्च अदालतले गत फागुन २३ गते नेकपा एमाले र माओवादी केन्द्र एकता गरी बनाइएको नेकपा भंग गरेपछि गत वैशाख १९ गते विमलाले माओवादी केन्द्र रोजेकी थिइन्। त्यसपछि माओवादीले उनलाई राज्यमन्त्री बनाएको थियो ।