काठमाडौं । ‘नेपाल कम्युनिष्ट पार्टी एकता राष्ट्रिय अभियान’का संयोजक वामदेव गौतमले आज दलको घोषणा गर्नुभएको छ । मंगलबार रिपोटर्स क्लबमा आयोजित पत्रका सम्मेलनमा उहाँले नयाँ दल घोषणा गर्नुभएको हो ।
तत्कालिन नेकपा विभाजन भएर एमाले र माओवादी अलग भएदेखि नै पार्टी एकताका लागि अभियान सञ्चालन गर्दै आएका गौतमले मंगलबार नेपाल कम्युनिष्ट पार्टी एकता राष्ट्रिय अभियान नामक छुट्टै पार्टी घोषणा गर्नुभएको हो ।
पार्टीको संयोजक वामदेव गौतम, सचिव डिबि कार्की, केन्द्रीय सदस्यहरुमा ओम शर्मा चालिसे, डिल्लिराज भट्टराई, दुर्गा भन्डारी, निमकान्त पान्डे, भगवती विस्ट, युवराज सफल लगायत छन् ।
पार्टी घोषणा कार्यक्रममा गौतमले एकीकृत कम्युनिष्ट पार्टीको आवश्यकता रहेको बताउनुभयो । आगामी तीन महिना गम्भीर रुपमा एकता अभियान सञ्चालन गर्ने गौतमको भनाई छ ।
उहाँले अहिले नै ४/५ वटा दर्ता भएका पार्टीले साथ दिएको र अझै ६/७ वटा दर्ता भएका दलले साथ दिने दाबी पनि गर्नुभयो ।
गौतमले आफ्नै पहलकदमीमा ४५ पटक पार्टी एकता भएको भन्दै पार्टी एकताका लागि आफू अनुभवी रहेको पनि सुनाउनुभयो ।
तत्कालिन नेकपा फुटाउने दोषी केपी ओली र पुष्पकमल दाहाल प्रचण्ड भएको पनि गौतमको आरोप थियो ।
