काठमाडौं । काठमाडौंको चन्द्रागिरी नगरपालिकाका विभिन्न १० राजनीतिक दलले मूल्यवृद्धि विरुद्ध संयुक्त संघर्ष गर्ने जनाएका छन् ।

मंगलबार बसेको संयुक्त बैठकले मूल्यवृद्धि फिर्ताका लागि आयल निगम घेराउलगायतका चरणबद्ध कार्यक्रम गर्ने निर्णय गरेको संघर्ष समितिका संयोजक एवम् राष्ट्रिय जनमोर्चाका नेता रोसन दानीले जानकारी दिनुभयो ।

उहाँका अनुसार पहिलो चरणको कार्यक्रम अन्तर्गत भोली (बुधबार) विहान ७ बजे आयल निगमको डिपो घेराउ गरी ज्ञापन पत्र बुझाइने छ ।

राष्ट्रिय जनमोर्चाका चन्द्रागिरि नगर इन्चार्ज रोसन दानीको संयोजकत्वमा बसेको बैठकमा नेकपा एमाले, नेपाली कांग्रेस, माओवादी केन्द्र, नेकपा (एकीकृत समाजवादी), राप्रपा, जसपा, नेकपा विप्लव, नेकपा (क्रान्तिकारी माओवादी), नेपा राष्ट्रिय पार्टी लगायतका दलहरु सहभागी थिए ।