प्रकाश थापामगर, काठमाठौँ ।
डा. युवराज सङ्ग्रौलाले नेपाली सेनालाई इन्डो–प्यासिफिक सेनाअन्तर्गतको थलसेना (ल्यान्ड आर्मी) बनाउने प्रयास भइरहेको बताउनुभएको छ ।
विश्व ट्रेड युनियन महासङ्घ (डब्लू्.एफ.टी.यू.) नेपाल कोअर्डिनेसनको आयोजनामा २०७९ जेठ ३१ गते काठमाडौँमा सम्पन्न अन्तरक्रिया कार्यक्रममा उहाँले सो जानकारी दिनुभएको हो ।
‘स्टेट पार्टनरसिप नयाँ कुरा होइन’ डा. सङ्ग्रौलाले भन्नुभयो– ‘केपी ओली प्रधानमन्त्री रहेका बेलाका परराष्ट्र मन्त्री प्रदीप ज्ञवाली अमेरिका भ्रमणमा गएकै बेला स्टेट पार्टनरसिपसम्बन्धी सम्झौता भइसकेको थियो ।’
स्टेट पार्टरसिप भनेको अमेरिकाको इन्डो–प्यासिफिक स्ट्राटेजी नीति नै भएको बताउँदै उहाँले यसबारे आफूहरू पहिलेदेखि नै प्रष्ट रहेको दाबी गर्नुभयो ।
‘इन्डो–प्यासिफिक स्ट्राटेजीअन्तर्गतको अमेरिकी सेनाका प्रमुखहरूको नेपाली सेनाका मुख्यालयमा भइरहेको भ्रमणले यो स्पष्ट भइसकेको छ’ उहाँले भन्नुभयो– ‘यो भ्रमण भनेको नेपाली सेनालाई इन्डो–प्यासिफकअन्तर्गत स्थलसेना बनाउनका लागि हो । त्यससम्बन्धी छलफल र निर्णय पहिले नै भइसकेको छ ।’
उहाँले अमेरिकाले भारतलाई तटस्थ नीतिबाट बाहिर निकालेर तथा नेपालमा भौतिक रूपमै अमेरिकी सेना उतारेर चीन घेर्ने नीति अगाडि सारेको बताउनुभयो । त्यसअन्तर्गत अमेरिकी सेनाहरूको नेपाल भ्रमण बाक्लिएको उहाँको भनाइ थियो ।
एम.सी.सी. पारित गर्नुभन्दा पहिले नै स्टेट पार्टनरसिपबारे आफूहरूले राजनीतिक दलका नेताहरूलाई जानकारी गराएको पनि उहाँले बताउनुभयो ।
‘एम.सी.सी पारित गर्नुभन्दा पहिले प्रचण्ड, माधव नेपाललगायतका नेताहरूसित हामीले एक हजार घण्टा खर्च गरेका छौँ’ उहाँले भन्नुभयो– ‘एम.सी.सी. पारित हुनु भनेको नेपालमा अमेरिकी सेना प्रवेश गर्नु हो भन्ने बुझाउन हामीले उहाँहरूलाई धेरैपटक डकुमेन्ट बुझाएका थियौँ ।’
उहाँले बेलिविस्तार लगाउनुभयो– ‘पहिला हामीले उहाँहरूलाई स्टेट पार्टनरसिप र अमेरिकी सेनाको नेपाल प्रवेशसम्बन्धी अङ्ग्रेजी भाषाका डकुमेन्ट बुझायौँ । नेताहरूले नेपालीमा अनुवाद गरेर दिनुस् भन्नुभयो । हामीले त्यो पनि गर्यौं । त्यसपछि उहाँले फेरि नेपालीमा तीनमहले बनाएर दिनुस् भन्नुभयो । तीनमहले पनि हामीले बनाएर दियौँ । फेरि उहाँहरूले भन्नुभयो, यो डकुमेन्ट लामो भयो, सारसङ्क्षेप दिनुस् । हामीले त्यो पनि गर्यौं तर यी सबैका बाबजुद उहाँहरूले संसद्बाट एम.सी.सी. पारित गरेरै छोड्नुभयो ।’
डा. सङ्ग्रौलाले देश गम्भीर मोडमा उभिएको बताउँदै देश बचाउन देशभक्त नेपाली एकपटक फेरि उठ्न आह्वान गर्नुभयो ।
कार्यक्रम अखिल नेपाल ट्रेड युनियन महासङ्घ (अन्टुक) का अध्यक्ष लोकराज भुसालको सञ्चालन, डब्लू.एफ.टी.यू. का नेपाल कोअर्डिनेटर प्रेमल खनालको अध्यक्षतामा सम्पन्न भएको थियो । सो अवसरमा डब्लू.एफ.टी.यू. मोहनमान स्वाँर, अन्टुकका महासचिव शालिकराम सापकोटालगायतको आतिथ्य रहेको थियो ।
