काठमाडौं । प्रतिपक्षी दल नेकपा (एमाले) का सांसद मोहन बानियाँले नेपालमा अहिले पाँच हजार अमेरिकी सेना रहेको बताउनुभएको छ ।
संसदको अन्तर्राष्ट्रिय सम्बन्ध समितिमा नेपालको परराष्ट्र नीतिमा बोल्दै सांसद बानियाँले पाँच हजार अमेरिकी सेना नेपालमा गोप्य रुपमा बसिरहेको दाबी गर्नुभयो । अमेरिकाले नेपालमा चलखेल बढाएको पनि सांसद बानियाँको भनाई छ ।
‘हामीले एमसीसी पास गर्यौँ। तर यो हाम्रो लागि घाँडो बन्दैछ। ५५ अर्बको लोभमा हामीले देशहित र राष्ट्रहित ख्याल गरेनौँ’ उहाँले भन्नुभयो, ‘अब हामी अमेरिकी सैन्य रणनीति इन्डो प्यासिफिक स्ट्राटेजीमा गाभिने सम्भावना बढेको छ ।’
यस्तै, सांसद भीम रावलले प्रधानमन्त्रीको अमेरिका भ्रमणको तयारीबारे संसदलाई जानकारी गराउन माग गर्नुभयो । भ्रमणको तयारी परराष्ट्र मन्त्रालयले नगरेर रक्षा मन्त्रालय र सेनाले गर्नु गम्भीर रहेको रावलको भनाई थियो ।
‘प्रधानमन्त्रीको अमेरिका भ्रमणमा स्टेट पार्टनरसीप कार्यक्रममा हस्ताक्षर गर्ने गोप्य तयारी भइरहेको छ । त्यसको परामर्शकै लागि प्रधानमन्त्री पत्नी आरजु अहिले भारत गएको भन्ने मलाई लाग्छ’ रावलले भन्नुभयो ।
रावलले अमेरिका सेनाको युटा नेशनल गार्डलाई नेपाल ल्याउने योजनाअनुसार स्टेट पार्टनरसीप सम्झौताको तयारी भएको बताउनुभयो ।
‘यो निकै गम्भीर कुरा हो। प्रधानमन्त्रीले संसदमा जानकारी गराउनुपर्छ’ रावलले भन्नुभयो ।
यसैबीच संसदको अन्तर्राष्ट्रिय सम्बन्ध समितिले प्रधानमन्त्री शेरबहादुर देउवालाई अमेरिका भ्रमणबारे छलफल गर्न बोलाउने भएको छ।
समितिकी सभापति पवित्रा खरेल निरौलाले समिति बैठकमा प्रधानमन्त्री देउवालाई असार ५ गते बोलाइने जानकारी दिनुभयो ।
समितिले परराष्ट्रमन्त्री नारायण खड्कालाई पनि असार ३ गते छलफलका लागि बोलाउन लागेको उहाँले बताउनुभयो ।
- अमेरिकी सेनाको इन्डो प्यासिफिक कमाण्डरले भेटे प्रधानसेनापतिदेखि राष्ट्रपति प्रधानमन्त्री
- अमेरिकी इन्डो प्यासिफिक कमान्डरको पाँचखाल र शिवपुरी भ्रमण (फोटो)
