काठमाडौं । नेपाल भ्रमणमा रहेका अमेरिकी सेनाको इन्डो प्यासिफिक कमाण्डका कमाण्डिङ जनरल चार्ल्स ए फ्लिन भेटघाटमा व्यस्त रहेका छन् ।
फ्लिनले शुक्रबार राष्ट्रपति विद्यादेवी भण्डारी, प्रधानमन्त्री शेरबहादुर देउवा र प्रधानसेनापति प्रभुराम शर्मासँग भेटवार्ता गरेका छन्।
प्रधामन्त्री देउवासँग बालुवाटारमा भएको भेटवार्तामा नेपाल–अमेरिका सुरक्षा सहकार्य तथा द्विपक्षीय हितका विविध विषयमा छलफल भएको हो।
भेटमा मानवीय सहायता र विपद् व्यवस्थापन लगायतका विषयमा छलफल भएको नेपालस्थित अमेरिकी दूतावासले जनाएको छ।
त्यस अवसरमा फ्लिनले राष्ट्रसंघीय शान्ति स्थापना मिसनहरूमा नेपालको निरन्तर योगदानको प्रशंसा पनि गरे।
एक महिनापछि हुन लागेको प्रधानमन्त्री देउवाको अमेरिका भ्रमणअघि अमेरिकी सेनाका वरिष्ठ अधिकारीले देउवासँग अर्थपूर्ण भेट गरेका हुन्। भेटमा नेपालस्थित अमेरिकी दूतावासका उपप्रमुख म्यानुअल मिकलर सहभागी थिए।
प्रधानमन्त्री देउवालाई भेटेलगत्तै फ्लिन राष्ट्रपति कार्यालय शीतलनिवास पुगेका छन्। उनले राष्ट्रपति विद्यादेवी भण्डारीसँग शिष्टाचार भेट गरे ।
त्यसलगत्तै उनले फ्लिनलाई सैनिक मुख्यालयमा गार्डअफ अनर प्रदान गरिएको छ । गार्डअफ अनरपछि प्रधानसेनापतिको कार्यालय गएका थिए । त्यहाँ नेपाली सेनाको अप्रेसन गतिविधिबारे ब्रिफिङ गरिएको छ । उनले प्रधानसेनापति प्रभुराम शर्मासँग उनकै कार्यकक्षमा भेटवार्ता पनि गरेका छन् ।
