काठमाडौं । काठमाडौं उपत्यकाको फोहोर व्यवस्थापनका लागि शहरी विकास मन्त्रालय, काठमाडौं महानगरपालिका र प्रभावित क्षेत्रका स्थानीय तहबीच त्रिपक्षीय सहमती भएको छ ।
शहरी विकास मन्त्री रामकुमारी झाँक्री र काठमाडौं महानगरका मेयर बालेन्द्र शाह, उपमेयर सुनिता डंगोलको रोहबरमा मन्त्रालय, महानगर र प्रभावित क्षेत्रका धुनीबेसी नगरपालिका र ककनी गाउँपालिकाबीच सोमबार सहमती भएको हो ।
बञ्चरेडाँडा ल्याण्डफिल साइटमा फोहोर व्यवस्थापनका लागि सोमबार तीनै पक्षले प्रतिवद्धता पत्रमा हस्ताक्षर गरेका छन् ।
सहमति अनुसार शहरी विकास मन्त्रालयले बञ्चरेडाँडा ल्याण्डफिल साइट प्रभावित क्षेत्रमा आगामी आर्थिक वर्षमा विभिन्न पाँच वटा सडकका लागि ४२ करोड ५० लाख, नदी नियन्त्रण कार्य, सामुदायिक भवन, मन्दिर निर्माण र वृक्षरोपण कार्यक्रमका लागि १ करोड ७० लाख बजेट विनियोजन गर्नेछ ।
यस्तै, वातावरणीय प्रभाव मूल्यांकन प्रतिवेदनका आधारमा जग्गा अधिग्रहणगर्नुपर्ने जग्गा यकिन गरी अधिग्रहण प्रक्रिया सुरु गर्ने जनाएको छ ।
साथै प्रभावित क्षेत्रका बासिन्दाका लागि १० बेडको अस्पताल सञ्चालन गर्न स्वास्थ्य मन्त्रालयलाई अनुरोध गर्नेछ ।
यसैगरी, काठमाडौं महानगरपालिकाले प्रभावित क्षेत्रका बासिन्दाको स्वास्थ्य बीमा गर्ने, पूर्वाधार विकासका लागि अनुदानलाई निरन्तरता दिने, १० दिनभित्र रासायनिक वा जैविक उपचार गरी दुर्गन्ध हटाउने, फोहोरलाई माटोले छोप्नेलगायतका व्यवस्था गर्ने प्रतिवद्धता जनाएको छ ।
यसैगरी महानगरले साउन १ गतेदेखि फोहोरलाई स्रोतमै छुट्याएर लैजाने व्यवस्था गर्नेछ भने ६ महिनाभित्र सिसडोलको ‘पोस्ट क्लोजर’ को प्रकृया सुरु गर्ने छ ।
यसैगरी प्रभावित क्षेत्रको तर्फबाट ककनी गाउँपालिका र धुनिबेसी नगरपालिकाले जेठ २४ गतेदेखि नै उपत्यकाको फोहोर बन्चरेडाँडा स्यानीटरी ल्याण्डफिल साइटमा उपयुक्त विधि अनुसार विसर्जन गर्न सहजीकरण गर्ने प्रतिवद्धता जनाएका छन् ।
