काठमाडौं । नेकपा (एमाले) का नेता घनश्याम भुसाललाई पार्टीले कारबाही गर्ने तयारी गरेको छ । भुसालले एक निजी टेलिभिजनलाई दिएको अन्तरवार्तामा अध्यक्ष केपी ओलीको आलोचना गरेको भन्दै अनुशासन आयोगले कारबाहीका लागि पार्टीमा सिफारिस गरेको हो।
भुसालमाथि कारबाही गर्न केशव बडाल अध्यक्ष रहेको केन्द्रीय अनुशासन आयोगले पार्टी सचिवालयलाई सिफारिस गरेको छ ।
यता, भुसालले भने नेतृत्वको आलोचना गरेकै आधारमा कारबाही गर्न नमिल्ने जिकिर गर्दै पार्टी बिगार्ने मुख्य दोषीमाथि छानबिन गरी कारबाही हुनुपर्ने जिकीर गर्नुभएको छ । मुख्य नेताले नै पार्टीलाई बिगार्ने काम गरेको र यसमा सबैभन्दा बढी जिम्मेवारी अध्यक्ष केपी शर्मा ओलीले लिनुपर्ने भुसालको भनाई छ ।
‘अध्यक्ष ओलीले संसद विघटन गर्नुभएको छ। संघीय र प्रदेश सरकारहरु हिँडाउनुभएको छ’ भुसालले भन्नुभयो, ‘महाधिवेशनमा लिस्ट पढ्नुभएको छ। लिस्ट पढेर पनि नभएपछि फलाना–फलाना चारजनालाई भोट नदेऊ भनेर ह्विप जारी भएको छ। आदि–इत्यादि सबै विषयको छानबिन हुनुपर्छ।’
कारबाहीको पत्र सचिवालयमा
नेता भुसालमाथि अनुशासनको कारबाही गर्ने जिम्मा अध्यक्ष ओलीले अनुशासन आयोगलाई दिएको बुझिएको छ ।
तर, विधानअनुसार आयोगले सोझै कारवाही गर्न नमिल्ने भएपछि आयोगले यसको जिम्मा पार्टीको केन्द्रीय सचिवालयलाई दिएको छ।
एमाले स्रोतका अनुसार भुसालले एउटा निजी टेलिभिजनलाई लिएको अन्तरवार्ताको प्रश्नउत्तर सबै उतारेर सचिवालयलमा पठाइएको अनुशासन आयोगका एक सदस्यले बताए । त्यही अन्तरवार्ताका आधारमा भुसालमाथि कारबाही गर्न सचिवालयलाई सिफारिस गर्ने निर्णय भएको उनको भनाई छ ।
एमालेले पदाधिकारीलाई समेटेर केन्द्रीय सचिवालय गठन गरेको छ, जसमा १९ सदस्य छन्। भुसालको कारबाहीसम्बन्धी आयोगको सिफारिसलाई सदर गर्न कम्तिमा १० जनाको बहुमत आवश्यक पर्छ।
एमालेको केन्द्रीय सचिवालयमा अध्यक्ष केपी शर्मा ओलीसहित ईश्वर पोखरेल, युवराज ज्ञवाली, अष्टलक्ष्मी शाक्य, रामबहादुर थापा बादल, विष्णु पौडेल, सुवास नेम्वाङ, सुरेन्द्र पाण्डे, शंकर पोखरेल, प्रदीप ज्ञवाली, पृथ्वी सुब्बा गुरुङ, विष्णु रिमाल, टोपबहादुर रायमाझी, लेखराज भट्ट, गोकर्ण विष्ट, योगेश भट्टराई, छविलाल विश्वकर्मा, रघुवीर महासेठ र पदमा कुमारी अर्याल छन्।
विगतमा तेस्रो धार भनेर चिनिएका १० जना नेताले माधव नेपाललाई साथ नदिएर ओलीलाई साथ दिएको सन्दर्भमा भुसालमाथि कारबाही भए एमालेभित्र थप संकट आउने विश्लेषण पार्टी नेताले गरिरहेका छन्।
