पोखरा । राष्ट्रिय जनमोर्चाका गण्डकी प्रदेश सांसद पियारी थापाले पूर्वपदाधिकारीलाई आजीवन सुविधा दिने विषय गलत भएको बताउनुभएको छ ।
मंगलबार गण्डकी प्रदेशको विनियोजन विधेयको सिद्धान्त र प्राथमिकता उपर सैद्धान्तिक छलफलमा भाग लिँदै सांसद थापाले जनताबाट निर्वाचित जनप्रतिनिधि जनताभन्दा माथि नहुने बताउनुभयो ।
उहाँले आजीवन सुविधा दिने विषयले नवशासकको जन्म हुन्छ भन्दै बरु यस्तो रकम शिक्षा र स्वास्थ्यमा खर्च गर्न उपयुक्त हुने बताउनुभयो ।
‘जनताबाट निर्वाचित हरेक प्रतिनिधि विशिष्ट व्यक्तित्व होइन । जनताकै बिचबाट, जनताको अवस्था भन्दा माथि कोही पनि होइन । ति त शासक हुन् जो जिवन्त सुविधा भोग गर्दै जनतालाई निचोर्न उद्वत हुन्छ । जनप्रतिनीधिलाई विशिष्ट बनाउने विषय मात्र ठिक होइन यसले नवशासकको उदय हुने छ’ उहाँले भन्नुभयो, ‘बरु शिक्षा स्वास्थ्यमा निशुल्क व्यवस्था गरौं । सर्वसुलभ गर्ने विषय वरु लोकप्रिय कार्यक्रम हुनसक्छ । बरु यतातिर सोच्नका निमित्त तीनै तहकै सरकारको विषेश ध्यानाकर्षण गराउन चाहान्छु ।’
यस्तै, सांसद थापाले कृषिमा बाह्य लगानी आउन नहुने बताउनुभयो । बाह्य लगानीले नेपाली कृषकलाई विस्थापित बनाउने उहाँको तर्क छ ।
सांसद थापाले भन्नुभयो, ‘संघीय सरकारको कृषि क्षेत्रमा बाह्य लगानीको विषय छ । यो आत्मघाति प्रकारको छ । सा–साना लगानीमा कृषि क्षेत्रलाई आफ्नो पेशा बनाएका यहाँका साना किसानहरुलाई यो विषयले विस्थापित गर्ने छ । कृषिक्षेत्रमा आत्मनिर्भर बनाउने विषयमा सरकारले ध्यान दिनुपर्छ ।’
उहाँले गण्डकी अस्पताललाई सुविधासम्पन्न बनाउन प्रदेश सरकारसँग माग गर्नुभयो । यस्तै, बाढी पहिरोका कारण समस्यामा परेका विद्यालयहरुको पुनर्निर्माण गर्नुपर्नेमा जोड दिनुभयो ।
यसैगरी, स्थानीय तहको केन्द्र जोड्ने सडकलाई प्राथमिकता दिन, महंगी र कालाबजारी नियन्त्रण गर्न तथा जमिनलाई उत्पादन र उत्पादकत्वमा परिणत गर्ने विषयमा सरकारको ध्यानाकर्षण गराउनुभयो ।
