काठमाडौँ । संयुक्त ट्रेड युनियन सङ्घर्ष समितिले पेट्रोलियम पदार्थको मूल्यवृद्धिको विरोध गर्दै त्यसलाई फिर्ता लिनुपर्ने आवश्यकतामा जोड दिएको छ ।
२०७९ जेठ १२ गते संयुक्त विज्ञप्ति जारी गर्दै उनीहरूले अन्तर्राष्ट्रिय बजारमा मूल्य बढेको भए पनि विभिन्न शीर्षकका करका कारणले पनि पेट्रोलियम पदार्थको मूल्यवृद्धि भएकोमा यस्तो धारणा व्यक्त गरेका हुन् ।
वक्तव्यमा उनीहरूले पेट्रोलियम पदार्थको मूल्यवृद्धिका कारणले श्रमिकलाई सहुलियत दिन तथा शत्–प्रतिशत तलब, ज्याला बढाउनसमेत माग गरेका छन् ।
त्यसैगरी उनीहरू मूल्यवृद्धिका विरुद्ध प्रगतिशील शक्तिहरूले गरेको आन्दोलनप्रति ऐक्यबद्धता, समर्थन र सहभागिता जनाउने तथा मजदुरको तर्फबाट पनि आन्दोलनको बेग्लै कार्यक्रम दिइने बताएका छन् ।
विज्ञप्तिमा अखिल नेपाल ट्रेड युनियन महासङ्घ (अन्टुक) का अध्यक्ष लोकराज भुसाल, अखिल नेपाल क्रान्तिकारी ट्रेड युनियन महासङ्घका अध्यक्ष ईश्वर तिमिल्सिना, क्रान्तिकारी ट्रेड युनियन महासङ्घ, नेपालका अध्यक्ष राजन तिमिल्सिना, अखिल नेपाल क्रान्तिकारी ट्रेड युनियन महासङ्घका अध्यक्ष विनोद थापा, अखिल नेपाल ट्रेड युनियनका इन्चार्ज कृष्णहरि भट्ट, वैज्ञानिक समाजवादी ट्रेड युनियन महासङ्घका संयोजक डी.बी. सर्वश्रेष्ठ, समाजवादी ट्रेड युनियन महासङ्घका अध्यक्ष लालध्वज नेम्वाङ, प्रगतिशील नेपाल स्वतन्त्र टे«ड युनियन महासङ्घका अध्यक्ष केदार गिरी र नेपाल ट्रेड युनियन फेडेरेसनका अध्यक्ष गङ्गाराम खड्गीको हस्ताक्षर रहेको छ ।
