काठमाडौं । नेकपा (एमाले) का नेता भीम रावलले एमसीसी अनुमोदनपछि अमेरिकाले नेपालमा प्रत्यक्ष हस्तक्षेप सुरु गरेको बताउनुभएको छ ।
नेपाल आएकी अमेरिकी उपविदेशमन्त्री उज्रा जियाले नेपालमा तिब्बती शरणार्थीसँग भेट गर्नु अमेरिकाको प्रत्यक्ष हस्तक्षेप भएको रावललले बताउनुभएको छ ।
आइतबार साँझ सामाजिक सञ्जालमा लेख्दै रावलले भन्नुभएको छ, ‘नेपाल प्रहरीको स्कर्टिङमा अमेरिकी उपमन्त्री एवं तिब्बती मामिला संयोजक उज्रा जिया दूतावासका उपप्रमुख सहित जाउलाखेल, तिब्बती शरणार्थी शिविर पुगेकी छन्। एमसीसी सम्झौता अनुमोदनपछि पहिलो हस्तक्षेपकारी कार्य। के नेपालको असंलग्न स्वतन्त्र परराष्ट्र नीति समाप्त भएको हो, गठजोड सरकार ?’
नेपाल प्रहरीको स्कर्टिङमा अमेरिकी उपमन्त्री एवं तिब्बती मामिला संयोजक उज्रा जिया दूताबासका उपप्रमुख सहित जाउलाखेल,तिब्बती शरणार्थी शिविर पुगेकी छन्!एमसीसी सम्झौता अनुमोदन पछि पहिलो हस्तक्षेपकारी कार्य।के नेपालको असंलग्न स्वतन्त्र परराष्ट्र नीति समाप्त भएको हो,गठजोड सरकार? pic.twitter.com/vFfbzEE0Hz
— Bhim Rawal, PhD (@BhimRawal179) May 21, 2022
अमेरिकाले तिब्बती शरणार्थीलाई उचालेर चीनको आन्तरिक मामिलामा हस्तक्षेप गर्न खोजेको भन्दै चीनले आपत्ति जनाइरहेका बेला अमेरिकी मन्त्रीले नेपालमै आएर तिब्बती शरणार्थीसँग अन्तरक्रिया गरेकी छन् । यसले नेपालको ‘एक चीन नीति’ माथि नै प्रश्न उठेको छ ।
भारत भ्रमण सकेर उनी यहाँ आएकी हुन्। जियाले भारतको धर्मशालास्थित निवासमा पुगेर निर्वासित तिब्बती धर्म गुरु दलाई लामासँग भेट गरेकी थिइन्।
शुक्रबार काठमाडौं आएकी उपविदेशमन्त्री जिया नेपाल भ्रमण सकेर आइतवार साँझ अमेरिका फर्केकी छिन्। जियालाई अमेरिकी विदेश मन्त्रालयमा मानवअधिकार, लोकतन्त्र र नागरिक सुरक्षा हेर्ने जिम्मेवारी छ। नेपालमा रहँदा उनले प्रधानमन्त्री, गृहमन्त्रीसहित उच्च तहमा भेटवार्ता गरिन् ।
