काठमाडौं । नेपाल भ्रमणमा रहेकी तिब्बत मामिला हेर्ने अमेरिकी उपविदेशमन्त्री उज्रा जियाले तिब्बती शरणार्थीसँग भेट गरेकी छन् ।
उपविदेशमन्त्री जिया शनिबार जावलाखेलस्थित तिब्बती शरणार्थी क्याम्प र बौद्धस्थित बौद्ध गुम्बाको भ्रमण गरेकी हुन् । त्यसक्रममा उनले जावलाखेलमा शरणार्थीहरुसँग अन्तरक्रिया गरिन्। उनले शरणार्थीका समस्याबारे चासो राखेकी थिइन् ।
शुक्रबार नेपाल आएकी उपविदेशमन्त्री जियाले कमलादीस्थित अमेरिकीराजदूतको निवासमा नेपालमा रहेका दलाई लामाका केही सांसदसँग पनि भेटेकी छिन् ।
बौद्धस्थित गुम्बाको अवलोकन गरेकी जियाले त्यहाँपनि केही शरणार्थीसँग कुराकानी गरिन् । अमेरिकी दूतावासका उपनियोग प्रमुख तथा दूतावासका कर्मचारी उपविदेशमन्त्री जियासँगै थिए।
तिब्बती धर्मगुरु दलाई लामा र भारतीय विदेश सचिव विनयमोहन क्वात्रालाई भेटेर उपविदेशमन्त्री जिया नेपाल आएकी हुन्। उनले बाइडेन प्रशासनका तर्फबाट प्रवासी तिब्बतीका मामिलामा आफ्नो प्रतिबद्धता जनाएकी छिन्।
उनले भारतमा दलाई लामालाई भेटेकोप्रति चीनले आपत्ति जनाइसकेको छ। सन् २०२१ को जनवरीमा बाइडेन राष्ट्रपति भएयता अमेरिका र निर्वासित तिब्बती नेतृत्वबीच पहिलो पटक उच्चतहमा भेटवार्ता भएको हो। जियाले दलाई लामा र चीन सरकारबीच संवादका गराउन भूमिका खेल्ने जिम्मेवारी पाएकी छिन्।
परराष्ट्र र गृह मन्त्रालयका अधिकारीले अमेरिकी उपविदेशमन्त्रीले तिब्बती शरणार्थी शिविरमा गरेको अन्र्तक्रियाबारे अनविज्ञता प्रकट गरेका छन्।
उपविदेशमन्त्री जियाले भोलि उच्चस्तरीय भेटवार्ता गर्ने कार्यक्रम रहेको परराष्ट्र मन्त्रालयले जनाएको छ । उनले प्रधानमन्त्री शेरबहादुर देउवा, परराष्ट्रमन्त्री नारायण खड्का र गृहमन्त्री बालकृष्ण खाँण र मुख्य सचिव शंकर दास बैरागीलगायतसँग आइतबार भेट्नेछिन्।
