काठमाडौँ । स्थानीय तह निर्वाचनअन्तर्गत सातवटा पालिकाको नतिजा सार्वजनिक भएको छ । निर्वाचनअघि तीनवटा पालिकामा निर्विरोध भएको थियो भने शुक्रबार भएको मतदानपछि थप चार वटा पालिकाको नतिजा आएको छ ।
डोल्पाका ३ वटा पालिकामा निर्विरोध निर्वाचित भएका थिए।
७ पालिकाको परिणाममध्ये एमाले ३ पालिका, कांग्रेस र नेकपा एकीकृत समाजवादीले २–२ पालिकाको नेतृत्व पाएका छन्।
एमालेबाट मनाङको चामे गाउँपालिका अध्यक्षमा एमालेका लोकेन्द्र बहादुर घले दोस्रो पटक निर्वाचित हुनुभएको छ । सो पालिकाको उपाध्यक्षमा कांग्रेसकी मिङ्मार डोमा लामा विजयी हुनुभएको छ ।
यस्तै, मुस्ताङको लो–घेकर दामोदरकुण्ड गाउँपालिकामा एमालेका लोप्साङ छोम्पेल विष्ट विजयी हुनुभएको छ ।
डोल्पाको शे–फोक्सुन्डो गाउँपालिकमा एमालेका धावा सम्डुक गुरुङ निर्विरोध निर्वाचित हुनुभएको थियो ।
नेपाली कांग्रेसको तर्फबाट मनाङको नार्पाभूमि गाउँपालिकाको अध्यक्षमा कोन्जो तेन्जिङ लामा विजयी हुनुभएको छ । उपाध्यक्षमा भने एमालेका फुन्चो लामा निर्विरोध निर्वाचित भइसक्नुभएको छ ।
यस्तै, मुस्ताङको घरपझोङ गाउँपालिकामा नेपाली कांग्रेसका मोहन सिंह लालचन विजयी हुनुभएको छ । उपाध्यक्षमा कांग्रेसकी जमुना थापा मगर विजयी हुनुभएको छ ।
यता नेकपा (एकीकृत समाजवादी) डोल्पाको काइके गाउँपालिका अध्यक्षमा अंगद कुमार राना निर्विरोध निर्वाचित हुनुभएको थियो । गाउँपालिकाको उपाध्यक्षमा कांग्रेसका निमा बुढा निर्विरोध हुनुभएको थियो ।
डोल्पाकै छर्का ताङसोङ गाउँपालिकमा नेकपा एकीकृत समाजवादी सोनाङ गुरुङ निर्विरोध हुनुभएको थियो ।
