काठमाडौं । नेपाली कांग्रेसका नेता तथा पूर्वमन्त्री मोहम्मद अफताव आलमलाई थुनामै राख्न सर्वोच्च अदालतले आदेश दिएको छ ।
शुक्रबार आलमविरुद्धको मुद्दामा सुनुवाई गर्दै सर्वोच्चले मुद्दाको अन्तिम फैसला नहुन्जेल थुनामै राख्ने जिल्ला अदालत र उच्च अदालतको आदेश सदर गरेको हो ।
न्यायाधीशद्वय सुष्मालता माथेमा र नहकुल सुवेदीको संयुक्त इजलासमा शुक्रबार सुनुवाइ भएको हो । सुनुवाइपछि आदेश जारी गर्दै आलतमलाई थुनामुक्त गर्न नमिल्ने जनाएको हो ।
नेता आलममाथि २०६४ साल चैत २७ मा भएको संविधानसभा निर्वाचनका क्रममा बम विस्फोट हुँदा घाइतेलाई इँटाभट्टामा जलाएर मारेको र विस्फोटक पदार्थ बमसमेतको प्रयोग गरी ज्यान मार्ने उद्योगको मुद्दा छ ।
जिल्ला अदालत रौतहटले आलमलाई पुर्पक्षका लागि थुनामा राख्ने आदेश गरेको थियो । जिल्लाको आदेशविरुद्ध उनी उच्च अदालतमा गएका थिए ।
उच्च अदालत जनकपुरको वीरगञ्ज इजलासले पनि उनलाई थुनामा राख्ने जिल्लाकै आदेश सदर गरेपछि सर्वोच्च पुगेका थिए ।
आलमलाई पुर्पक्षका लागि ललितपुरको नक्खु कारागारमा राखिएको छ । आलमलाई तीन वटा मुद्दामा ३२ वर्ष कैदको माग गरिएको छ । बम बिस्फोट, कर्तव्य ज्यान र ज्यान मार्ने उद्योगको मुद्दा उनीविरुद्ध दर्ता भएको हो ।
