काठमाडौं । पाँचदलीय गठबन्धनले आज (शुक्रबार) काठमाडौं उपत्यकामा संयुक्त चुनावी सभा गर्दैछ । दिउँसो २ बजे काठमाडौंको भृकुटीमण्डपमा सभा गर्न लागिएको हो ।
सभालाई पाँचै दलका शीर्ष नेताहरुले सम्बोधन गर्ने कार्यक्रम छ । संयुक्त सभामा राष्ट्रिय जनमोर्चाका अध्यक्ष चित्रबहादुर केसीले सम्बोधन गर्नुहुने छ ।
केही समययता उपत्यका बाहिर रहेका केसी संयुक्त सभालाई सम्बोधन गर्न काठमाडौं आउनुभएको छ । त्यसक्रममा युगदर्शनसँग कुरा गर्दै केसीले केपी ओलीको प्रतिगामी कदम रोक्न गठबन्धन बनाउनुपरेको बताउनुभयो ।
यद्यपी गठबन्धनलाई प्रमुख भनिएका राजनीतिक दलका नेताहरुले चुनाव जित्ने र आफ्नो क्षेत्र सुरक्षित पार्ने रणनीतिका रुपमा प्रयोग गरेको गुनासो गर्नुभयो ।
उहाँले राजनीतिक वैचारिक रुपमा फरक भएपनि प्रतिगमनविरुद्धको गठबन्धन भएकाले गठबन्धनका उम्मेदवारलाई जिताउन सबैले इमान्दारीपूर्वक लाग्न आग्रह गर्नुभयो ।
युगदर्शनको जिज्ञासामा अध्यक्ष केसीले राष्ट्रिय जनमोर्चाले चुनावलाई रणनीतिक रुपमा लियो र दक्षिणपन्थी भयो भनेर पार्टीबाट अलग भएकाहरुले ओलीसँग मिलेर आफ्ना उम्मेदवार उठाएको बताउनुभयो । फुटपरस्त समूहमा कुनै राजनैतिक वैचारिक स्पष्टता नभएका कारण उनीहरु अलमलमा रहेको केसीको भनाई थियो ।
यसअघि गठबन्धन दलहरुले हिजो भरतपुरमा संयुक्त सभाको आयोजना गरेका थिए ।
राष्ट्रिय जनमोर्चाले काठमाडौं, भरतपुरलगायत ६ वटा महानगर र ११ वटा उपमहानगरमा राष्ट्रिय जनमोर्चाले गठबन्धनका उम्मेदवारहरुलाई समर्थन गरेको छ । वडातहमा भने कहिँ गठबन्धन र कतिपय स्थानमा एकल प्रतिस्पर्धामा उत्रिएको छ ।
काठमाडौंको चन्द्रागिरी नगरपालिकामा राजमोले गठबन्धनको तर्फबाट उपप्रमुखमा उम्मेदवारी दिएको छ । त्यहाँ रोसन दानी उपप्रमुखको उम्मेदवार हुनुहुन्छ ।
