काठमाडौं । काठमाडौंको कोटेश्वरमा नेकपा समाजवादीका अध्यक्ष माधव कुमार नेपालको सांसद विकास कोषको रकमबाट सहमति विपरित भवन निर्माण भएपछि स्थानीयवासी आक्रोशित भएका छन् ।

काठमाडौं महानगरपालिका वडा नं. ३२ श्रृंखला टोलमा गत २०७७ जेष्ठ ४मा सार्वजनिक जग्गामा भवन निर्माण गर्नका लागि जग खन्ने समयमा मात्र टोलबासीहरु तथा श्रृंखला टोल विकास समाजलाई उक्त स्थानमा किरियापुत्री भवन बनाउने कुरा थाहा भएको स्थानीयवासीले जनाएका छन् ।

‘सोही दिन यो भवन कसले र किन निर्माण गर्न लागेको भनी बुझ्दा सो भवन निर्माण हुने क्षेत्रमा बसोबास गर्ने प्रत्यक्ष असर पर्ने स्थानीयलाई थाहै नदिई संलग्न नै नगराई यस क्षेत्रका संघीय संसद माधव कुमार नेपालको सांसद विकास कोषको रकमबाट भवन निर्माण गर्न भवन निर्माण समिति गठन भएको तथ्य जानकारीमा आयो,’ श्रृंखला टोल विकास समाजद्वारा जारी विज्ञप्तिमा उल्लेख छ ।

टोलबासीहरु तथा श्रृंखला टोल विकास समाजले यस्तो किरियापुत्री भवन आवासीय क्षेत्रमा बनाउन मनासिब नहुने र यसले टोलबासीहरुमा नकारात्मक मनोवैज्ञानिक असर पर्न जाने भएकाले सोही समयमा सोही प्रयोजनको लागि भवन निर्माण नहोस् भनी टोल विकास समाजले बिरोध स्वरुप जग खन्ने काममा विरोध गरेको र सोको लागि उक्त भवन निर्माण समिति तथा काठमाण्डौ महानगरपालिका वडा नं. ३२ बडा कार्यालयलाई उक्त भवन किरियापुत्री प्रयोजनको लागि निर्माण नगरियोस् भनी गत २०७७ जेष्ठ ४ मा निबेदन दिइएको भएपनि भवन जवर्जस्ती रुपमा निर्माण गरिएको जनाइएको छ ।

विज्ञप्तिमा भनिएको छ, ‘गत २०७७ जेष्ठ ४ मा दिईएको निबेदन र भवन निर्माणमा बाधा गरेकाले २०७७ जेष्ठ ५ मा काठमाडौं महानगरपालिका वडा नं. ३२ बडाका वडा सदस्य हिरा देवी पोखरेलको उपस्थितिमा भवन निर्माण समिति, टोलबासीहरु तथा श्रृंखला टोल विकास समाजकाबीच भएको छलफलमा टोलबासीहरु तथा श्रृंखला टोल विकास समाजले किरियापुत्री प्रयोजनको लागि भवन निर्माण नगरियोस् भनी आफ्नो भनाई राखेकोमा भवन निर्माण समिति सहितको संयुक्त बैठकमा निवेदक स्थानीय टोलबासीहरुको भावनालाई कदर गर्दै उक्त भवनको उपयोग स्थानीय टोलबासीहरुको सहमतिमा गर्ने र यो भवन बहुदेश्यीय सामुदायिक भवन हुने भन्ने लिखित सर्वसम्मत निर्णय भएको थियो ।’

बैठकले बजेट फिर्ता गरी उक्त भवन किरियापुत्री प्रयोजनमा नल्याउने, भनन बहुउदेश्यीय प्रयोजनको लागि प्रयोग गर्ने भन्ने भद्र सहमति गरेको थियो । उक्त बैठकले भवन निर्माण सम्पन्न भएपछि किरियापुत्री प्रयोजन बाहेक कुन प्रयोजनका गर्ने भन्नका लागि निवेदक टोलबासीहरुको तर्फबाट तीन जना र भवन निर्माण समितिको तर्फबाट दुई जना गरी पाँच सदस्यीय सुझाब समिति गठन गर्ने र सो सुझाव समितिको राय सुझावका आधारमा भवनको प्रयोग गर्ने लिखित निर्णय समेत भएको थियो ।

तर पूर्व प्रधानमन्त्री माधव नेपालको पद र शक्तिको दुरुपयोग गर्दै बलजफ्ती भवन निर्माण गरी सहमति बिपरित कृयापुत्री भवनका रुपमा सो भवनलाई प्रयोगमा ल्याइएको टोलबासीहरुको आरोप छ ।

‘२०७७ जेष्ठ ५ को निर्णय अनुसार टोलबासीहरु तथा श्रृंखला टोल विकास समाजबाट भवन निर्माणमा कुनै बाधा विरोध गरिएन । भवन निर्माण चलिरेहेको समयमा भवन निर्माण समितिलाई भवन प्रयोजनको निश्चितता नभएकाले भवनको भित्री स्वरुप बहुदेश्यीय प्रयोजनमा उपयुक्त हुने बनाउन भनिएकोमा सो समितिले सोही अनुसार बनाईएको भनिएको थियो’, विज्ञप्तीमा उल्लेख छ ।

भवन निर्माण सम्पन्न भए पश्चात भवन कुन प्रयोजनमा ल्याउने भन्नका लागि गठित सुझाब समितिको बैठक राख्न टोलबासीहरुको तर्फबाट सुझाव समितिमा रहेका सदस्यहरुले बारम्बार ताकेता गर्दा पनि कुनै बैठक नराखिएको टोलबासीहरु बताउँछन् । बैठक नबोलाएपछि समाजले टोलबारीहरुको सामुहिक भेला राखि सो भेलाले उक्त भवनको वैकल्पिक प्रयोजनबारे गरेको निर्णय भवन निर्माण समिति र काठमाडौं महानगरपालिका वडा नं. ३२ वडा कार्यालयलाई लिखित जानकारीसमेत गराएको थियो ।

भवन निर्माण समितिले भवन निर्माण सम्पन्न भएपछि भवनको स्वामित्व कसको हुने, त्यसको रेखदेखको जिम्मा कसको हुने, भवन कसरी सञ्चालन गर्ने, कुन प्रयोजनको लागि उपयोग गर्ने, भवन संचालन गर्ने संचालक समिति निर्माण गर्ने, संचालन बिधि तथा प्रक्रियाका लागि संचालन बिधान, नियम तथा कार्यबिधि तयार गर्नु पर्ने, सञ्चालनबाट भएको आम्दानी तथा खर्चको जिम्मा कसले लिने, आर्थिक तथा सामाजिक लेखापरिक्षणको ब्यबस्था के हुने भन्ने निर्क्योल भएपछि भवन विधिबत रुपमा उद्घाटन गरेर मात्र सञ्चालनमा ल्याइनुपर्ने उनीहरुको माग छ ।