काठमाडौं । जातीय समता समाज र अखिल नेपाल जनजाती सम्मेलनको ३५ औँ स्थापना दिवस एक कार्यक्रमको आयोजना गरी मनाइएको छ । काठमाडौंको वागबजारमा जातीय समता समाज र अखिल नेपाल जनजाती सम्मेलनले संयुक्त कार्यक्रम आयोजना गरी स्थापना दिवस मनाएका हुन् ।
कार्यक्रमलाई सम्बोधन गर्दै जनजाती सम्मेलनका अध्यक्ष निमबहादुर मगरले जातीय आन्दोलनलाई वर्गीय आन्दोलनसँग जोडेर संघर्ष अगाडि बढाउनुपर्ने बताउनुभयो । जातीय समस्यालाई विशुद्ध जातीवादी दृष्टिकोणले हेर्दा समाजमा जातीय द्न्द्व र विग्रह मात्रै उत्पन्न हुने उहाँले बताउनुभयो ।
‘एनजीओ, आईएनजीओ लगायत जातीवादीहरुले जनजाती र दलितका समस्यालाई केवल जातीय दृष्टिकोणले मात्रै हेर्ने गर्दछन् । त्यसले समस्याको समाधान होइन, समाजमा विग्रह ल्याउँछ’ बुढाले भन्नुभयो, जातीय समस्यालाई वर्गीय मुक्ति आन्दोलनसँग जोडेर संघर्ष अगाडि बढाउनुपर्छ । कम्युनिष्ट पार्टीको नेतृत्वमा मात्रै विभिन्न जाती, क्षेत्र, समुदायको समस्याविरुद्ध संघर्ष अगाडि बढाउन सकिन्छ ।’
कार्यक्रममा अखिल नेपाल किसान महासंघ (अप्फा) का अध्यक्ष भैरवराज रेग्मीले वर्तमान व्यवस्थाभित्रबाट गरिने आन्दोलनले सामान्य सुधार हुनसक्ने भन्दै दक्षिणपन्थीहरुले यही व्यवस्थाभित्र सामान्य सुधारमा जोड दिने र वामपन्थी संकीर्णवादले कुनै पनि सुधार र आन्दोलनलाई वेवास्ता गर्ने समस्या रहेको बताउनुभयो ।
‘क्रान्तिकारीहरु परिस्थितीको ठोस विश्लेषण गरेर प्राप्त उपलब्धिको रक्षा गर्दै अगाडि बढ्छन्’ रेग्मीले भन्नुभयो, ‘जातीय समस्याविरुद्ध पनि प्राप्त उपलब्धिको रक्षा गर्दै अगाडि बढ्नुपर्छ । सामान्य सुधारमा सन्तोष गरेर हामी बस्दैनौं ।’
कार्यक्रममा नेकपा (मसाल) बागमती प्रदेश प्रवक्ता समीर सिंहले पार्टीमाथि चौतर्फी हमला भइरहेको उल्लेख गर्नुभयो । पार्टी सदस्यहरुको दृढता र स्पष्ट विचारबाटै पार्टीमाथि भइरहेका आक्रमणको सामना गर्न सकिने बताउनुभयो ।
कार्यक्रममा वक्ताहरुले राष्ट्रियता र जनतन्त्रको रक्षा, भ्रष्टाचार निवारण, संघीयताको खारेजी, जातीय मुक्तिलगायत आन्दोलनलाई अगाडि बढाउन आगामी स्थानीय निर्वाचनमा राष्ट्रिय जनमोर्चाका उम्मेदवारलाई जिताउन आग्रह गरेका थिए।
अखिल नेपाल जनजाती सम्मेलनका बागमती प्रदेश अध्यक्ष दावा लामाको अध्यक्षतामा भएको कार्यक्रममा जातीय समता समाजका महासचिव भक्त विश्वकर्माले पनि शुभकामना दिनुभएको थियो ।
कार्यक्रममा अखिल नेपाल महिला संघका अध्यक्ष मिना पुन, राष्ट्रिय जनमोर्चाका केन्द्रीय कोषाध्यक्ष मधु क्षेत्री, केन्द्रीय सदस्य लक्ष्मी केसी, काठमाडौं जिल्ला अध्यक्ष झविन्द्र बेलवासे, अखिल नेपाल उद्योग व्यापार संघका केन्द्रीय सदस्य रितु केसी, अखिल नेपाल बुद्धिजीवी संघका महासचिव भरतमणि भण्डारी, शिक्षक संघका प्रतिनिधि भोला ढकाल, अखिल नेपाल ट्रेड युनियन महासंघ (अन्टुक) का प्रेम मोक्तान, नेकपा (मासल) काठमाडौंका प्रवक्ता जगत रेग्मी, युवक संघका केन्द्रीय सल्लाहकार रमेश पौडेल, युगदर्शनका सम्पादक विद्यानाथ अधिकारी, किसान संघका जिल्ला अध्यक्ष केबी घलेलगायत नेताहरुको आतिथ्यता रहेको थियो ।
